Struktur Reti

2.0 Struktur Reti

Baka ke ditemu kitai, struktur reti ke batang amat  iya nya bakani chara sesebengkah leka jaku ulih meri reti ke nyentuk ngagai sesebengkah ayat. Dikena nerangka enggau lenak agi, kitai ulih beratika chunto tu : enti ayat ‘ Bunyau siku mayau’ nya betul, ayat ‘Bunyau ukai siku mayau’ deka nyadi salah. Ba chunto nya tadi kitai ulih meda bekani dua ayat nya belaban reti lalu reti ke belaban baka tu mega bisi dikembuan leka jaku laki enggau indu, idup enggau mati, chelum enggau burak, besai enggau mit, pagi enggau lemai, tabar enggau manis sereta  mayuh agi.

Chunto ke bukai, enti ayat ‘Mujab siku nembiak lelaki’ nya betul, ayat ‘ Mujab siku nembiak  indu’ nya deka nyadi salah. Taja pia, ayat ‘ Mujab ukai siku nembiak lelaki’ deka meri reti ke bebida iya nya Mujab siku ‘bujang bungas’, ‘apai orang’ enggau  ‘aki tuai’. Bepelasarka chunto nya tadi, kitai bela nemu leka jaku ‘lelaki’  enggau ‘indu’ ngembuan reti kediri empu bepanggai ba sapa orang nya. Taja pia,iya bebida enggau jaku ‘ukai  indu’ tauka ‘ukai lelaki’ ketegal ti ngembuan mayuh reti. Disimpulka, struktur reti ulih meri  reti ke bebida nitihka jalai ngena leka jaku ba sesebengkah ayat.

2.1 Sinonim

Sinonim iya nya  leka jaku ke ngembuan reti ti sebaka tauka damping reti iya enggau pangan diri. Ambika chunto baka leka jaku surut enggau nikal, labang enggau burak, palui enggau dadak, belelang enggau pegi, merejuk enggau engkechit, sereta ke bukai. Dalam  pengidup kitai besehari-sehari, kitai mega bisi  tepedaka leka jaku sinonim. Ambika chunto maya kitai ba librari, kitai tentu bisi tepedaka leka jaku munyi tu ‘minta kita anang ragak, bejaku enggau berandau’. Taja pan enda nyengala engkeman reti tiga bengkah leka jaku nya tadi, tang mih reti iya nyau damping sebaka.

Leka jaku sinonim ke patut dikena bepanggai ba orang ti bejaku. Ambika chunto, mayuh orang suah agi belandikka leka jaku ‘kereja’ ari ‘pengawa’. Taja pia, dua bengkah leka jaku tu endang ngembuan reti ke sebaka sereta bekunsika penteba semantik. Kelimpah ari nya, bisi mega leka jaku ke ukai sinonim tang  bekunsi penteba semantik ti sebaka. Ambika chunto baka leka jaku ‘lelaki’ enggau ‘bujang’ ti mandangka orang nya sama penempa, tang leka jaku ‘lelaki’ ngembuan penteba semantik ‘tuai’ lalu leka jaku ‘bujang’ ngembuan penteba semantik ‘biak’. Chunto tu, mandangka pemedis kitai tetemuka leka jaku ke amat engkeman sinonim enggau pangan diri.

2.2 Antonim

Antonim nya jaku ke belaban tauka besangkal reti enggau jaku bukai. Taja pia, enda semua leka jaku ngembuan reti ke besangkal, nya alai leka jaku ‘enda’ bisi dikena. Ambika chunto baka leka jaku ‘jenak’ besangkal enggau ‘enda jenak’. Bisi beberapa bansa antonim, baka leka jaku tinduk enggau dani, idup engggau mati, bediri enggau duduk, tajam enggau tumpul, niki enggau nurun, gerai enggau sakit sereta ke bukai ti dikumbai betipak (pasangan komplemen). Kena sengkaum ba antonim bansa tu iya nya jaku baka enda idup-mati enggau enda mati-idup, enda tinduk-dani enggau enda dani-tinduk.

Bansa antonim ti kedua iya nya mandangka kaul tikas (hubungan darjah) baka leka jaku  besai-mit, tebal-nipis, tinggi-baruh, panjai-pandak, kurus-gemu enggau ke bukai. Taja pia, reti leka jaku adjektif ba genap tipak tu bepanggai ba tukuh utai nya. Ambika chunto, selumpung kayu dikumbai kitai panjai enti iya dibandingka enggau lumpung kayu bukai ke sama bansa enggau iya. Kelimpah ari nya, leka jaku nya empu enda ulih mandangka tukuh utai nya enggau tetap. Ambika chunto baka, leka jaku ‘mit’ ba ‘gajah mit’ enda sebaka reti sereta tukuh iya enggau ‘cit mit’.

Bansa antonim ti kepenudi dikumbai kaul betimbal (hubungan bertentangan) baka, meri-nerima, nyual-meli, nembiak-pengajar, sereta ke bukai. Ambika banding, enti A ‘meri’ pemakai nagagai B, B deka ‘nerima’ pemakai nya. Baka nya mega enti X nya ‘pengajar’ lalu Y nya ‘nembiak’. Ba jaku English, kitai mega ulih meda leka jaku antonim bansa tu baka trainer-trainee, mentor-mentee, employer-employee, interviewer-interviewee sereta ke bukai.

2.3 Homonim

Homonim iya nya dua tauka lebih jaku ti ngembuan chara nyebut enggau nyepil ke sebaka tang bebida ba reti iya. Ambika chunto, leka jaku ‘langkau’ ke ngemai reti ‘langkau umai tauka langkau kebun’ enda sama reti iya enggau ‘langkau’ ke ngemai reti ‘sebengkah ari bansa ai bisa’. Homonim ulih ngasuh kitai saru lebuh bekenaka iya maya berandau enti nadai bepelasarka sesebengkah situasyen. Kebuah pia, laban homonim ngembuan chara nyebut enggau nyepil ke sebaka tang bebida ari sukut reti. 

1                    Dara nurun mulung buah rian ti benung labuh di kebun sida.

2                    Aki Dom meringga mulung dikena nampung taun ti begantung senduk.

1                    Nembiak enda diasuh buruk macha ngambika mayuh bulih penemu.

2                    Tungkat rumah sida Jana rebah laban udah buruk diempa merung.

L    Leka jaku ‘mulung’ enggau ‘buruk’ ba genap iti ayat ba atas nya ngembuan reti ke bebida. Ba ayat keterubah, ‘mulung’ ngemai reti ti madahka ‘ngumpul buah’. Ba ayat (2), ‘mulung’ ngemai reti ‘sebansa utai tumbuh’. Baka nya mega leka jaku ‘buruk’ ba ayat (1), ngemai reti ‘lembau gawa tauka ngelusu’ lalu ba ayat (2), ‘buruk’ ngundan reti ‘utai ti udah jai’.

2.3.1 Homograf

Siti ari penteba homonim iya nya homograf. Homograf  tu jaku ke sebaka chara nyepil iya tang bebida ba chara nyebut enggau reti  iya. Ambika chunto, leka jaku ‘mata’, ‘asi’ enggau ‘pama’ ngembuan  chara nyebut enggau reti ke bebida tang chara nyepil ke sebaka:

·         Mata – empai mansau

·         Mata – perengka tubuh dikena mensia meda

·         Asi – diandai

·         Asi – utai empa

·         Pama – ringkar / ingkar

·         Pama –sebansa ari raban katak

2.3.2 Homofon

Homofon mega  siti ari pampang homonim ti ngembuan jaku ke sebaka chara nyebut iya tang bebida ari reti enggau sepil iya. Ngambika  pekara tu nyemetak agi, uji peratika chunto ba baruh tu:

1.    Qari – gelar ngagai orang ke macha Al-Quran

Kari – sebansa pemakai

2     Massa – media massa

Masa – meri tabi basa

3     Duit – duit ringgit

Duet – belagu (2 iku)

2.4 Hiponim

Hiponim iya nya leka jaku ke ulih ngeraup  sebengkah raban leka jaku. Ambika chunto, baung, enseluai, palau, juak, adong, banta, buing, kepiyat, empurau enggau tapah nya hiponim ngagai ikan. Haponim ke bendar amat iya nya jaku rama ti ngembuan kaul diri sebilik enggau jaku ke bukai tauka jaku ti ngembuan raban iya empu. Ambika chunto, kitai bela nemu gadung, burak, chelum, kuning enggau kelabu nya hiponim ngagai chura. Ari sukut leksikal, jaku nya tadi ngembuan penteba chura ti mandangka leka jaku nya ngembuan penteba ke sebaka ba tikas jaku. Chunto ke bukai baka leka jaku kenyalang, sempidan, sengayan, ruai, pipit, kuncit, nendak, ketupung, enggau beragai ti ngayanka penteba burung. Baka nya mega leka jaku munsang, beraguk, engkuli, enturun enggau ringin iya nya hiponim ngagai ‘jelu’.

2.5 Polisem

Leka jaku ke ngembuan reti ke mayuh ti besangkut paut dikumbai polisem. Polisem ke bendar amat iya nya kaul jaku enggau rambai jaku ke ngembuan dua reti tauka lebih sereta ngembuan etimologi ke sebaka. Dalam Bup Serba Reti Jaku Iban, mayuh leka jaku ti ngembuan lebih ari siti reti, baka leka jaku ‘kikir’ enggau ‘pesi”. Leka jaku tu dikumbai polisem ketegal ti ngembuan lebih ari siti reti lalu suah dipandangka ngena lumur  ‘I’, ‘II’, ‘IV’ enggau ke bukai enti dalam kamus.

Ambika banding, leka jaku ‘kikir’ ngemai reti: 1.kereban tukang dikena ngaluska besi tauka kayu, “Aki ngena kikir besi ngaluska mata sangkuh nya”,  2.perangai ti balat ngenyadi sereta luke, “Seduai melaki bini nya kelalu kikir, nya alai anak iru seduai iya enda entap”. Chunto ke bukai baka leka jaku ‘pesi” ngundan reti: 1.gerami, “Ikan ke dibeli aku pesi indai ngena garam alus”, 2.kena laban beris tauka pechik, “Aku berasai chelap keleju pesi ujan”, 3.ngiling, ngulung tauka ngelipat lengan baju, kaki tanchut enggau ke bukai, “Pesi kaki tanchut nuan awakka enda kamah laban latak”, 4. nambahka pemanah, “Uji asuh pesi tukang enggau intan tinchin ti deka ditempa iya nya tadi”.

2.6 Gentilang Reti

Gentilang reti iya nya seraban bansa leksikal ke ngembuan reti ti besangkut paut ketegal leka jaku nya dikenataika nengah konteks ti sebaka. Gentilang reti mega bekaul enggau reti ti dikemeranka seraban jaku. Kelimpah ari nya, gentilang reti mega bisi kaul kolokasyen, iya nya dua tauka lebih jaku ke besangkut paut enggau pangan diri. Ambika chunto, leka jaku ‘bub’ bekolakasyen enggau tebal, nipis, ayat, lambar, topik, pemuka jaku, sanding penemu sereta ke bukai. Sesebengkah jaku tauka morfem nya  ngembuan gentilang reti kediri empu. Ambika chunto, uji peratika gentilang reti jaku ‘’universiti’ ba Kar 1.1.

      Kar 1.1 Gentilang Reti Leka Jaku ‘Universiti’

Jaku ‘universiti’ nya batang reti (makna inti) lalu jaku bukai ti ngelingi iya dikumbai reti nyelepak (makna sampingan). Batang reti iya nya reti ke nyadi pugu ngagai sesebengkah leka jaku lalu reti nyelepak  nya ulih beserak ba pampang reti leka jaku ke bukai. Ngambika lenak agi, leka jaku ‘librari’ ulih nyadi batang reti sereta ngembuan gentilang reti  ti nyengkaum leka jaku bub, jurnal, keretas kereja, majalah, surat pemberita, tesis enggau ke bukai. Nya alai gentilang reti jaku ‘universiti’ enggau  ‘librari’ sama bisi ngembuan leka jaku tesis enggau bup lebuh nyadi batang reti. Bepelasarka penerang nya tadi, disimpulka kitai gentilang reti ulih dikena nuku ke reti sesebengkah jaku tauka ayat.

2.6.1 Reti Jaku

Reti jaku mega dikumbai reti leksikal lalu pampang ke mansik reti leksikal tu disebut semantik leksikal. Reti jaku tauka leksikal nunjukka pansik senentang utai ti deka dikenataika. Leka jaku ulih dikena meri reti ngagai sesebengkah pekara kelimpah ari ti ulih ngayanka sesebengkah konsep. Ari sukut linguistik, jaku siti ari unit leksikal. Nya alai, penemu senentang reti jaku beguna amat dikena kitai milih sereta bekenaka jaku ti engkeman dalam randau tauka jurai.

Genap orang ti bejaku enda ulih ngubah reti jaku ti udah bisi nitihka reti dikedeka iya empu. Taja pan kitai nadai ditagang meri reti ngagi genap leka jaku tang pekara tu deka begunaka taga jam ti lama endur orang ke ninga meretika iya laban reti leka jaku nya udah bebida ari reti ke selama. Kamus ngundan nyau deka semua leka jaku besereta enggau reti iya. Reti leka jaku ke bisi dalam kamus disebut reti leksikal iya nya reti leka jaku nya empu lalu nadai besangkut paut  enggau guna iya dalam ayat.

Fonem nya tukuh linguistik ti mida reti lalu morfem nya tukuh linguistik ti ngembuan reti. Jaku iya nya tukuh morfem ti ngembuan reti reti kediri empu. Jaku ulih ngembuan  reti penuh tauka reti leksikal. Ambika chunto, reti leksikal ‘pua’ iya nya ‘perengka dikena mungkur tubuh maya tinduk’. Reti ulih dipeda ba tikas ke paling baruh bepun  ari morfem, leka jaku, rambai jaku, klausa enggau ayat.  Leman semantik ke sebaka ulih nyadi sebagi ari reti ke bebida. Ambika chunto, leman semantik ‘mensia’ nyengkaum reti ba baruh tu:

Pengajar                  Ibu                                    Tuan                             Nembiak Apai                         Pengelicha                        Indai                             Janda Lutur                        Tuai Rumah                      Aya                               Petunggal

Reti leka jaku  ‘apai’ enggau ‘aya’ besangkut paut enggau ‘lelaki’ lalu ‘pengajar’, ‘lutur’, ‘tuai rumah’, enggau ‘pengelicha’ besangkut paut enggau ‘pengawa’. Taja pia, leka jaku ‘apai’ mega ngundan reti ‘tuai bilik’. Baka nya mega reti leka jaku ‘janda’, ‘ibu’ enggau ‘indai’ bekaul enggau ‘indu’ lalu leka jaku ‘nembiak’ ngundan reti ‘orang biak sereta agi besekula’.

2.6.2 Reti Ayat

Ba mayuh pekara, kitai suah bekomunikasyen enggau pangan diri ngena rambai jaku enggau ayat. Reti rambai jaku enggau ayat bepanggai ba reti leka jaku  ke bisi dalam iya lalu bakani leka jaku nya disakumka. Leka jaku enggau ayat  dikena kitai  meri nama ngagai sesebengkah utai nya. Nya alai, leka jaku enggau ayat ulih dikena kitai bejurai  tauka nerangka sesebangkah pekara tauka sebarang utai. Pansik mega nerangka bekani reti leka jaku besakum ba dalam reti rambai jaku enggau ayat. Kaul reti entara unit ti besai agi tu disebut reti rambai jaku tauka semantik ayat  ti bebida ari semantik leksikal. Bisi empat aspek ke ulih ngayanka kaul reti ayat tauka semantik ayat:

Parafrasa

Parafrasa bereti dua ayat ti ngembuan reti ke sebaka taja pan bisi ubah ba struktur ayat nya. Ayat-ayat ba baruh tu sebagi ari parafrasa, taja pan bebida ari sukut penekan tang reti iya tetap sama:

1.    a) Manuk nya nepan ba dan kayu

b) Endur manuk nya nepan iya nya ba dan kayu

2.    a) Buji kereja nyadi pengajar

b) Kereja Buji iya nya pengajar

 Pengamat

Sesebengkah ayat nya disebut amat enti iya ngembuan pengamat. Ambika chunto, kitai nyebut ayat ‘Malaysia merdeka kena 31 Ogos 1957’ nya amat, ayat ‘Malaysia merdeka kena 31 Oktober 1957’ nya bula. Kebuah kitai nyebut iya pia laban kitai nemu reti dua bengkah ayat nya enggau nyentuk. Kitai beratika pengamat ayat nya ngena chara mandingka enggau dunya nyata iya nya fakta sejarah. Lebuh meda fakta sejarah nya, kitai deka nemu ayat keterubah nya betul lalau ayat kedua nya bula. Simpul iya ditu,  dikena nukuka amat tau bula pekara nya, kitai patut nengah jalai meda malin tauka fakta.

Sengkaum

Sengkaum iya nya kaul senentang sesebengkah ayat. Ambika chunto, ayat ‘entukar nya  bechura mansau’ nyengkaum ayat ‘entukar nya ukai burak tauka gadung’. Baka nya mega ayat ‘pengajar nya bejalai kaki ke sekula’ nyengkaum ayat ‘pengajar nya enda nepan entukar’. Dikena nemu pengamat sesebengkah ayat begunaka kitai nibuh pedulika pengamat ayat ke siti agi. Ambika chunto. Peratika ayat-ayat ba baruh tu:

1.    (a) Peter nemu semua senentang Balak.

(b) Peter nemu Balak udah bebini.

2.    (a) Apoi deka makai semua bansa ikan sungai.

(b) Apoi deka makai ikan enseluai, palau enggau banta.

Bepelasarka chunto nya , kitai nemu ayat 1(a) enggau 2(a) amat tang patut nibuh pedulika pengamat ayat 1(b) enggau 2(b). Kebuah pia laban ayat kedua udah sengkaum dalam reti ayat keterubah.

Besangkal

Besangkal ngayanka dua ayat ti enda sebaka ari sukut pengamat, iya nya enti siti ayat nya amat lalu ayat siti agi nya bula. Dipuntangka kitai, pengamat siti ayat nya begunaka kitai ngibuhka pemula ayat siti agi. Ambika chunto, peratika ayat ba baruh tu:

1.    (a) Indai iya nyadi pengelicha

(b) Indai iya nadai pengawa

2.    (a) Gerijih baru umur tujuh taun

(b) Gerijih nembiak pom enam

Bepelasarka chunto ayat nya, ayat 1(a) enggau 2(a) nya amat lalu ayat 1(b) enggau 2(b) nya bula. Kaul ke baka nya disebut besangkal laban pengamat ayat keterubah besangkal enggau pengamat ayat ti kedua.

2.6.3 Reti Denotasyen

Denotasyen iya nya leman reti sesebengkah jaku ti bepelasarka dunya nyata tauka reti jaku iya ti bendar. Ambika chunto, denotasyen ‘periuk’ baka ke bisi dalam kamus  iya nya ‘perengka dapur dikena berapi tauka manduk asi’. Reti denotasyen ba ditu mega senentang reti ke diterima bala mayuh sereta ngembuan malin ke sama. Ambika chunto, reti denotasyen ngagai  ‘jelu’ iya nya ‘utai idup ti nadai pikir tauka runding’ lalu  reti denotasyen ‘bungai’ iya nya ‘sebagi ari utai tumbuh ke bechura mayuh bengkah sereta bau rengut’. Denotasyen  nadai besangkut paut enggau munyi, chara nyebut tauka sepil sesebengkah jaku ke bebida tauka sebaka. Entei diperatika endar, denotasyen nya reti ke ayan (nadai dilalaika). Bisi istilah bukai ti bisi bekaul enggau reti denotasyen iya nya:

1.     Reti referensial, konseptual, ideasional – reti ti mandangka runding ke dikelai ngena tanda tauka kaul entara jaku enggau tanda iya.

2.    Reti kognitif – reti ti ulih dirundingka mensia. Reti tu ngena jaku ke terang enggau engkeman sereta bekaul enggau jaku ilmiah.

3.    Reti preposisyen – reti ke besumbuk ari pekara ke bisi ba ayat ti ngembuan penteba fakta tauka bisi pengamat akal.

2.6.4 Reti Konotasyen

Konotasyen iya nya leman reti sesebengkah jaku tauka raban jaku ti bepelasar pelaba tauka asai ati orang ke bejaku tauka penulis sereta orang ti ninga tauka macha. Ambika chunto, ‘pelanduk’ ngemai konotasyen  ‘besai akal’. Reti konotasyen enti dibanding enggau reti denotasyen lebih besai agi laban bisi besangkut paut enggau pengasai ati. Chunto iya, reti konotasyen ‘jelu’  iya nya ‘orang ke nadai penyinu’ lalu ukai jelu ke bendar baka jelu engkuli tauka jelu enturun sereta ke bukai.

Enti diperetika endar, konotasyen nya ngembuan reti ke bukai kelimpah ari reti iya ke bendar baka leka jaku ‘baya pantai’ iya nya ‘orang laki ke balat ngemula tauka nipu orang indu’. Baka nya mega reti konotasyen leka jaku ‘bungai’ ke ngemai reti ‘orang indu tauka indu dara’ lalu ukai bungai ti bendar baka bungai kenunsung tauka bungai meresian sereta ke bukai. Sebaka enggau denotasyen, konotasyen mega nadai besangkut paut enggau munyi, chara nyebut tauka sepil sesebengkah jaku ke bebida tauka sebaka.

Konotasyen baka ke ditemu kitai bisi bekait enggau budaya tauka pengarap sesebangkah bansa. Ambika banding, chura ‘mansau’ ba bansa Cina ngembuan konotasyen ‘pengaga ati’ enggau ‘pemujur’. Nya alai, jaku ke ngembuan reti konotasyen ulih ngemai empas ti negatif tauka positif. Enti leka jaku ke dikena kitai ngembuan konotasyen ti salah, pekara tu nemu ngasuh ati siku-siku orang nya ensiban. Ambika chunto, leka jaku ‘kurus’ enggau ‘kurus kering’ ngembuan konotasyen ke bebida. Orang indu rindu agi dikumbai ‘kurus’ ari ‘kurus kering’ taja pan nya endang nyata ba tubuh iya empu.

2.6.5 Reti Konseptual

Reti konseptual iya nya reti ti diulihka ari pekara ke ditulis tauka disebut. Ambika chunto, lebuh kitai nyebut ‘universiti’, kitai tentu berundingka senentang palan endur nampung belajar lalu dia bisi nembiak, bup, peresa, pengelicha, librari enggau utai bukai ke bisi bekaul enggau ‘universiti’.  Taja pia reti konseptual genap iku kitai mensia enda sebaka nitihka penemu diri empu. Ambika chunto, siku anak mit ke suah diperinsa indai iya lalu siku agi anak mit ke selalu diandai sereta diasika indai iya. Dua iku anak mit tu deka ngembuan runding ke bebida senentang leka jaku indai. Anak mit ti keterubah, deka nyebut ‘indai’ nya sitan ketegal iya ke suah diperinsa indai iya. Taja pia, reti ‘indai’ ba anak mit ti kedua iya nya orang ti pemadu iya mentas sereta badas  laban ti suah ngasi sereta ngandai iya.

2.6.6 Reti Stilistik

Reti stilistik suah dikaitka kitai enggau situasyen sosial lalu bisi orang bejaku. Orang ke bejaku enggau orang ke ninga ulih nukuka asal penatai, rampa menua tauka tikas pendiau entara seduai iya. Ambika chunto lebuh kitai minta siku-siku orang nya datai tauka nemuai ke rumah, kitai deka ngemaruhka diri ngena ayat baka tu “enti bisi maya lepa, datai mih ke langkau aku ba Julau”. Ke bendar amat, iya ukai diau ba ‘langkau’ tang diau ba rumah batu ti manah sereta besai. Chunto kedua iya nya lebuh ngaga sesebengkah perengka bumai, dia orang ke ngaga sintung nya deka madah munyi tu “baka gamal aku empu mih sintung nya”. Ke bendar amat, sintung nya ukai baka gamal iya tang mih menyana sereta manah dipeda.