Fonetik Enggau Fonologi

1.0 Pemuka Jaku

Dalam kereja kus BIB3104 (Fonetik enggau Fonologi Jaku Iban) semester 2 PISMP, aku bisi bejuraika senentang definisyen fonetik enggau fonologi jaku Iban enggau ngelansa. Taja pia, batang pekara ke dipansik dalam kereja kus tu iya nya bida entara sebut leka jaku nitihka pelilih menua diri empu enggau sebut jaku Iban standard. Kebuah pia, laban kitai Iban ngembuan mayuh variasyen jaku nitihka batang ai taja pan semua kitai ulih meretika jaku ti disebut pangan diri. Ambika banding, jaku Iban Kanowit ngembuan penyelai ari jaku Iban bukai ari sukut sebut “r” lalu jaku Iban Julau kelebih agi ba Batang Mujok leka jaku ke ngundan urup “a” suah diganti enggau “o”.

Ngambika pekara tu nyentuk agi, aku mega dipinta bejuraika senentang tiun tauka rentak jaku nitihka pelilih menua diri empu. Kebuah pia, laban genap pelilih menua tauka batang ai kitai Iban ba menua Sarawak tu ngembuan tiun tauka rentak jaku ke enda sebaka sekalika tirur, laju, deras, kasar, tauka lembut. Ambika banding, jaku Iban Kapit enggau jaku Iban Betong ngembuan bida ke nyata kelebih agi ari sukut tiun tauka rentak jaku ti kasar tauka lembut. Kelimpah ari nya, aku mega dipinta ngerikod jaku lalu ngaga transkripsyen jaku ti dirikod nya tadi. Reti nya, munyi jaku ke dirikod  tadi diberi lambang tauka simbol ti disebut kitai lambang fonetik. Nya alai, tanya kereja kus ke diberi tu engkeman amat enggau penemu fonetik enggau fonologi ti mansik mayuh bengkah aspek jaku mensia.

Dikena ngemujurka agi pengawa tu, aku bisi ngasilka simpul penemu senentang pekara ke dipansik dalam kereja kus tu. Ngambika pansik siti-siti kereja kus nya genap sereta nadai penimpang, nya alai ba pengujung pansik aku ngasilka refleksyen ti berkaul enggau kereja kus. Aku mega enggau naka bebendar nguji nitihka kriteria kereja kus ti manah baka ngembuan isi ti selampur, konsisten sereta silik lalu nadai ngembuan penyilap ba sepil. Aku amat ngarapka pansik kereja kus ke sekali tu ulih meri empas ke nyata ngagai  aku empu ba penemu fonetik enggau fonologi jaku Iban. Kebuah pia, ngambika aku ulih ngembuan penemu tauka pelasar ke tegap senentang semua aspek ke besangkut paut enggau jaku Iban sebedau nyadi pengajar jaku Iban jemah ila.

2.0 Definisyen Fonetik Enggau Fonologi

Fonetik enggau fonologi nya dua pekara ti nyau  deka sebaka ari segi reti tang ngembuan bida tauka penyelai iya mimit ari pangan diri. Fonetik nya pansik munyi jaku ti diasilka organ artikulasyen. Reti nya fonetik mansik produksyen enggau persepsyen munyi jaku.  Taja pia, fonologi nya siti bidang  ti mansik sistem sekeda munyi dalam sesebengkah jaku mensia. Bidang fonologi nyimpul, betungkapka lalu bebidaka tukuh munyi sesebengkah  jaku dikena nentuka atur enggau tukuh sekeda munyi jaku nya. Nya alai fonologi  nerangka pasal sekayu munyi ti diasilka mensia, betungkap lalu nyeritaka sistem munyi  semua jaku ti dipansutka, sekalika disebut  mensia enggau betul tauka enda.

            Indirawati Zahid & Mardian Shah Omar (2006) dalam bup iya Fonetik enggau Fonologi, madahka fonologi nya siti bidang linguistik ti mansik munyi jaku ke diasilka mensia. Pansik ti dipejalaika deka nemu baka ni munyi jaku nya tau diasilka organ sebut mensia enggau baka ni genap bengkah munyi jaku nya tau dikelaska. Penemu ke bebida bisi dibantaika Paitoon M. Chaiyanara (2006), ti ngumbai fonologi nya semua munyi jaku ti dipansutka neresa rumbang nyawa mensia. Nya alai fonetik nya siti komponen ba fonologi ti mansik rengka tubuh tauka organ sebut ti ngasilka munyi jaku enggau organ ti nerima munyi jaku nya. David Abercrombie (1971), dalam bup iya Element of General Phonetics, madahka fonologi ngembuan tukuh teknikal lalu sesebengkah jaku nya deka diperatika ngena chara analitikal. Reti nya, kitai ukai semina ninga munyi jaku tang mega beratika mekanisme rengka tubuh ti nyempulang jaku ke disebut nya tadi.

            Lebuh kitai mensia ngasilka munyi jaku, bisi tiga bengkah proses nyadi iya nya fonetik artikulasyen, fonetik akustik enggau fonetik auditori. Fonetik artikulasyen nya bidang ti mansik chara sesebengkah munyi diasilka rengka tubuh artikulatori ba tubuh kitai mensia. Reti nya, kitai bekenangka pasal palan alai ngasilka munyi ke dikumbai palan artikulasyen. Taja pia, fonetik akustik nya sebengkah bidang penemu ti mansik gelumbang angin ke mai munyi nya ngagai pending mensia. Reti nya, fonetik akustik mansik klasifikasyen munyi ti pansut ari mulut kitai ari sukut fitur fizikal baka empas munyi, pengelantang munyi enggau pemanjai munyi sebut. Fonetik auditori tu bekaul enggau pekara mending sereta proses ti nyadi lebuh kitai nerima munyi lalu baka ni munyi tu diasaika tauka didinga kitai.

3.0 Pansik

Dikena ngemujurka kereja kus tu, aku bejalaika pansik ngena chara beratika tikas pendiau sereta pelajar sekula, gaya rampa menua enggau gaya sebut leka jaku sereta tiun tauka rentak jaku orang lebuh  berandau. Kelimpah ari nya, aku mega bisi nanya sereta ngerandau sekeda orang ke ngembuan pengelandik senentang jaku kelebih agi  jaku Iban. Dikena ngulihka informasyen tambah, aku ngiga sanding penemu tauka malin ti engkeman sereta bisi kaul enggau pansik kereja kus ari bup enggau internet.

3.1 Bida Entara Sebut Leka Jaku Nitihka Pelilih Menua Diri Empu Enggau Sebut Jaku Iban Standard

Bertil Malmberg (1968), udah magi bidang fonologi ngagai empat bengkah bidang ke mit agi iya nya penemu fonetik rama, fonetik deskriptif, fonetik sejarah enggau fonetik normatif. Ari empat bidang ti dibantaika Bertil tu, penemu fonetik  deskriptif  chukup beguna dikena kitai bejuraika bida entara sebut leka jaku nitihka pelilih menua tauka dialek enggau jaku Iban standard. Pekara ti dipansik dalam fonetik deskriptif iya nya baka ni dialek tau nyadi dalam sesebengkah bansa jaku ti sebaka. Reti nya, baka ni gaya jaku tauka sebut leka jaku tau bisi besibil ari pangan diri taja pen jaku nya endang bansa jaku ke sebaka. Ambika banding, kitai Iban mayuh ngembuan variasyen jaku nitihka batang ai baka Iban Betong, Iban Sebuyau, Iban Balau, Iban Julau, Iban Batang Rajang, Iban Saribas, enggau sekeda dialek Iban ke bukai.

            Mayuh amat pekara ke tau dipansik enti kitai deka nemu baka ni dialek nyadi dalam sesebengkah bansa jaku kitai mensia. Pansik tu mega ulih dikena nyerenih baka ni kitai bebidaka munyi entara dialek tauka sebut leka jaku nitihka pelilih menua enggau jaku Iban standard.  Ari pemayuh dialek bisi siti variasyen ke diangkat nyadi variasyen standard ti diempu semua. Ngembuan pengentap lalu diterima semua orang nya nyadika kebuah iya dikumbai standard. Jaku Iban standard bebida ari dialek laban iya ngembuan pelasar dalam atur sepil, jalai jaku, sebut enggau terminologi. Jaku Iban standard dikena ba pengawa formal lalu dialek dikena ba pengawa ukai formal. Penyerekang ari segi sebut dalam variasyen standard sigi agi bisi nyadi. Taja pia standard munyi sebut nya mesti ulih diterima semua orang ba situasyen formal, dia sebut nya agi diaku sebut standard.

Lebuh beratika bida entara sebut leka jaku pelilih menua enggau sebut jaku Iban standard, jaku Iban Batang Rajang kelebih agi Iban Kanowit endang nyata jauh endar bida iya ari sebut jaku Iban standard. Sida bisi napi penanggul ba munyi getar “r” enggau lateral “l”. Kebuah pia, laban tebal agi Iban Kanowit tirur lebuh berandau tauka bejaku. Ambika banding, leka jaku “orang” disebut “uhang” tauka “ohang” lalu leka jaku “garam” disebut nyadi “gaham”. Baka nya mega enggau leka jaku bukai ke ngundan urup “r” ditukar nyadi  “h” lebuh disebut. Leka jaku bepun enggau urup “l” baka “lambar” disebut “hambar”, ‘rambal” tauka “rambar”. Pia mega leka jaku  ti beujungka  “r” baka “ular” disebut “ulal”, “uhal” tauka “urar”. Penanggul ke bansa tu endang meruan ditapi Iban menua Batang Rajang lau mengkang agi dititi ditali bala uchu ichit sida nyentuk ke sehari tu.

            Suah mega kitai ninga lebuh Iban Batang Rajang berandau tauka bejaku, leka jaku ke disebut sida meranggang tauka enda datai. Penanggul ke bansa tu endang nyata ba bala kaban kitai Iban Ketibas enggau Song.  Ambika chunto lebuh sida bejaku, “ram, mandi ke dai tai wai”. Leka jaku “aram” dipuntangka sida nyadi “ram”, “pendai” nyadi “dai” lalu “kitai” disebut nyadi “tai”. Taja baka nya, Iban Balau ngembuan dialek ti suah agi mubuhka urup “k” ba belakang leka jaku sepengudah urup “i” tauka nganti urup “a” ngena “e” lebuh bejaku. Uji peratika lebuh Iban Balau bejaku, “ka kini nuan madik?”.Ba ayat tanya nya tadi leka jaku “madi” suah disebut “madik” tauka “made”. Dialek ke bansa tu suah didinga kitai tunga ke menua Sri Aman tauka Semanggang  ke diwan Iban Balau.

           

            Kelimpah ari nya, bansa Iban ba sekeda endur mega bisi napi penanggul ba munyi  vokal “a” ti ukai glottis. Ambika chunto, ba sekeda endur di Saribas enggau Kelaka leka jaku “gula” disebut “gulo”, “ika” disebut “iko”, “kita” disebut “kito”, “sida” disebut “sido” lalu “baka” disebut “bako”. Penanggul ke bansa tu mega bisi ditapi Iban Julau kelebih agi ba sekeda alai Batang Mujok. Dikena nentuka ni bagi sebut ti tau diterima betul dalam jaku Iban standard, kitai mesti betatika fonetik jaku Iban. Ngena fonetik, chara sebut leka jaku ti baka tu ulih ditentuka pengentap iya lalu nadai nyadi polemik.

3.2 Tiun Enggau Rentak Jaku Nitihka Pelilih Menua Diri Empu

Mayuh orang ngumbai tiun enggau rentak jaku tu enda beguna dalam jaku mensia. Kitai nyangkal penemu nya laban iya ke bendar tiun enggau rentak jaku tau meri reti ngagai ayat enggau genteran jaku. Gerayak ati orang ke bejaku suah bendar dikelala ari tiun enggau rentak iya bejaku. Kekadang intonasyen bepanggai ba emosyen orang ke bejaku kelebih agi enti iya nya ringat sereta mansutka jaku nganu orang. Endang udah tentu kitai nemu pengeringat iya ari rentak jaku nya. Reti nya, rentak jaku orang ti bejaku tau meri biuh ukai semina ngagai bala peninga tang mega ngagai mesej nya empu. Kebuah pia, laban rentak jaku tau ngayanka gaya pendiau orang, emosyen sereta empas jaku orang nya.

            Taja pia, kitai anang saru penemu senentang tiun enggau rentak jaku ba bansa Iban. Kitai enda patut nguse pemanah budi basa, pemai ulah, asai ati tauka pendiau orang nya bepelasarka tiun enggau rentak jaku iya. Kebuah pia, laban tiun enggau rentak jaku ba kitai bansa Iban endang ngembuan bida iya nitihka batang ai tauka pelilih menua. Nya alai enti rentak jaku orang nya bisi kasar didinga, ukai reti iya mangah tauka ringat. Baka nya enti rentak jaku orang nya lembut sereta landai didinga, ukai reti iya nelap tauka ngembuan budi basa. Ambika banding, lebuh Iban Kapit bejaku “mati salai lama amat nuan enda nemuai, perut peruti nuan nya deka buai batu ngagai kami ditu”. Lebuh ninga jaku nya,mayuh sekeda orang takut sereta nangi niki rumah iya laban jaku ti kasar sereta enda nyamai didinga. Taja pia, iya ke bendar amat mantaika pengaga ati diri tauka penyiru enggau tuju ati ke endang manah.

            Lebuh orang ke bejaku nya ngena tiun tauka rentak jaku ke lembut sereta begadai, kitai tentu nemu penatai pelilih menua iya. Kebuah pia, laban Iban Betong kelebih agi ba menua Layar endang nyau deka selampur ngembuan tiun tauka rentak jaku ti lembut. Reti nya, jaku sida menua nya semina tak selanjur pia aja sereta betiun. Chukup jarang kitai tetemuka Iban ba pelilih menua nya ngembuan rentak jaku ti kasar tauka tinggi lebuh berandauka tauka bejaku enggau sapa-sapa orang enda milih dini-dini alai tauka maya. Nya alai kitai deka napi penanggul deka nentuka sekalika orang nya ringat tauka enda lebuh sida bejaku. Pemangah siku-siku orang nya mega pedis amat deka ditemu enti kitai semina bepelasarka jaku sida. Ari nya tadi, kitai enda ulih semina beratika guna intonasyen ari aspek lingusitik, paralinguistik sereta ekstralinguistik aja.

3.3 Transkripsyen Jaku Ti Dirikod

[#ɲadi’ kita’ kә bәgәlumu’ sari’ tu’/ kita’ kә’ baru’ bәlabuh mәda’ utay’ udah ka’ ɲadi’ manah-manah diatur//#]  [#rumah kitay tu’ ɲu’ udah bis’i bәraŋkar/ kita’ pagi’ tadi’ udah datay bisi’ mәda’ opis bәpilih//#]  [#rәti’ ɲa’ tua’ udah nandaw’ umay’//#]  [#kitay’ tu’ udah ŋabas  tawka әnti’ baka’ kitay’ bәrumah kitay’  tu’ udah lәbih ari’ ŋaga’ taba’ tu’//#]  [#udah bәlabuh ŋәntak kitay’ tu’//#]  [#alay kitay’ әnda’ taw әnda’ tumu’ baka’ tu’ laban kitay tu’ tadi’ әŋgay alah//#]  [#ɲadi’ ǰaku’ aku’ әŋgaw’ kita’/ diŋa’ kita’ manah-manah//#]  [#sәkali’ tu’/ pәɲakal tawka pkr kә’ bәdiri’ di’ mәnua’ mәluan әŋgay’ alah//#] [#kitay’ mәsti’ mәnaŋ!!//#]  [#ɲa’ alay’ kitay’ mәsti’ sәdia’#]  [#diatu’ aku’ ka’ nәlah kә mimit lәka’ ǰaku’ tu’ tadi’//#]  [#kitay bәlabuh ari ŋәna’ ǰaku’ әmpat puluh tuǰuh tawn kitay’ udah ŋaga’ mәnua’ malajsia//#] [#iŋat/ uǰi kita’ naɲa’ diri’ әmpu’/ aku’ tu’ umur lima’ puluh lima’ tawn//#]  [#rәti’ ɲa’ tadi’ aku’ umur tuǰuh tawn  mәnua’ malajsia’ tu’ digaga’//#]

[#ɲadi’ aku’ tu’ tadi’ udah bәǰalay ba’ majuh mәnua’//#]  [#ɲad’ mәnua’ kitay kә’ mәnua’ kitay’ dajak ku’ kitay’ tu’ tadi’ aku’ naday’ nәmu’ ubah ɲa’ aku’//#]  [#rumah kita’ naday’ api’/ baka’ ɲa’ ga’ kami’ din/ rumah’ kita’ tu’ naday’ ay’/ baka’ ɲa’ ga’ kami’ din//#]  [#kәlia’ aku’ tu’ ɲamay’ mandi’/ diatu’ әnti’ kitay’ mandi’ kә’ ay’/ әnti’ kitay’ әnda’ bәkәndas baka’ babi’ kitay’ tu’ bәlaŋ/ bәlaŋ laban ay’ ɲa’ čukup kamah//#]  [#di’ mәnua’ kami’ din/ kita’ mәda’ ikan kәɲuluŋ/ әŋka’ kita’ әnda’ nәmu’ ikan kәɲuluŋ ku’ kami’//#]  [#rindu’ mәda’ ikan kәɲuŋ ɲa’ suba’ sәbәlah atas ay’//#]  [#diatu’ dini’ nuan mәda’ ikan’ kәɲuluŋ/ ija’ udah lәɲaw//#] [#ɲadi’ čәrita’ tu’ tadi’ kәna’ aku’ may’ kita’ ŋәrundiŋ/ ɲawh ni’ kita’ tu’ udah mansaŋ//#]  [#ɲadi’ pәmansaŋ kita’ tu’ uŋgal әnda’ ǰawh/ nama’ kәbuah aku’ ŋumbay’ kita’ әnda’ ǰawh//#]

[#baka’ tu’ gaja’ ija’/ aku’ dәka’ bәǰaku’ ŋәna’ lima’ iti’ pәnәmu’//#] [#satu’/ pәnәmu’ aku’ tadi’ madah kitay’  ditәkan oraŋ ari’ pәmanday’/ kәdua’ kitay’ ditәkan oraŋ ari’ ǰalay’ pәmisi’/ kәtiga’ kitay’ ditәkan oraŋ ari’ čara’ dagaŋ/  kәәmpat kitay’ tu’ ditәkan oraŋ ari’ čara’ kitay’ bulih rәta’//#]  [#ŋambika’ kitay’ tu’ tadi’ taw’ maǰu’//#]  [#ɲadi’ kәlima’ aku’ dәka’ nәgu’ mimit pasal nama’ utay’ kә’ patut dikәrәǰa’ kitay’//#]  [#ɲadi’ diatu’ aku’ tu’ tadi’ amat lima’ puluh lima’ tawn taŋ kami’ kә’ nәmbiak’/ pәda’ kita’ ǰaku’ ɲa’/ baru bian pan әnda’ tuay’/ aku’ tu’ pan bәdaw’ tuay’//#]  [#kami’ kә’ nәmbiak tu’ tadi’ udah’ ŋatur diri’/ kami’ kә’ nәmbiak tu’ tadi’ udah bәgәmpuŋ/ ɲadi’ kami’ kә’ nәmbiak tu’ tadi’ udah datay’ ba’ rumah panǰay’ kita’ lalu nәraŋka pәnәmu’ matak kita’ ɲukuŋ kami’//#] 

[#nama’ kәbuah kami’ bәgunaka sukuŋ kita’?//#]  [#kami’ bәgunaka sukuŋ kita’ ari’ rumah panǰay’ laban әnda’ kasih kita’ mәda’ kami’ kә’ biak//#]  [#sida’ biak’ ari’ kami’ sәkula’/ bisi’ kә’ panday’ sәkula’ әnda’ bulih ga’ pәnunduk/ bisi’ kә’ bulih pәnuduk ɲu’ sәpәka’ oraŋ mәri’ ga’ ba’ univәrsiti//#] ɲu’ ukay’ utay’ ko tua’ taŋ ija’ dibәri’ oraŋ kәbukay’//#]  [#udah pansut ari’ uivәrsiti ka ŋiga’ kәrәǰa’ / naday’  kәrәǰa’//#]  [#ka’ ŋiga’ kәrәǰa’ ba’ opis pәrintah ari’ tawn dua’ ribu’ әnam ŋagay’ tawn dua’ ribu’ sәmbilan/ sәribu’ lapan ratus tuǰuh pәminta’ ari’ bansa’ dajak ka’ minta’ kәrәǰa’ ba’ opis pәrintah//#] [#mina’ dua’ ratus tuǰuh puluh iku’ aǰa’ bulih kәrәǰa’//#]  [#әnda’ sәndat kami’ kә’ nәmbiak pәda’ kita’//#] ɲa’ alay’ kami’ tu’ ŋәmpuŋ diri/’/#] [#kami’ diatu gawa’ bәndar-bәndar ka’ ŋaŋkat kә’ diri’//#]  [#taŋ ŋaŋkat kәdiri’ kami’ әnda’ ulih әnti’ kita’ әnda’ ɲukuŋ әnti’ kita’ әnda’ mәri’ pәŋasih ŋagay’ kami’//#]  [#әnti’ kita’ әnda’ nuluŋ kami’ luŋkup/ luŋkup kami’ luŋkup adat kita’/ uču’ ičit kita’ luŋkup//#]

[#kasih anaŋ әnda’ kasih//#]  [#taŋ әnti’ kita’ әnda’ kasih kati’ ku’ әŋgaw’ way ukay’ siku’ karam/ bәla’ karam mih kitay’ tu’//#] ɲadi’ kәdua’ tu’ tadi’ әndur kitay’ bәrundiŋ//#]  [#ari’ pәlaǰar tu’ tadi’/ dia’ kita’ nәmu’ sәmua’ utay’ ulih ari’ pәlaǰar//#] [#nama’ kәbuah kita’ bulih utay’ ari’ pәlaǰar? laban pәlaǰar tu’ tadi’ muka’ rundiŋ čara’ kita’ bәfikir//#]  [#bakani bәfikir? Baka’ tu’ mih gaja’ ija’ bәfikir//#]  [#kitay’ bәfikir/ әnda’ taw’ ɲalah bansa’ oraŋ bәlama-lama/ kitay’ әnda’ taw’ ɲalah pәrintah bәlama-lama//#]  [#kitay’ tu’ ɲadi’ pәrintah pia’?//#]  [#ija’ kә’ dibay’ aku’ tәŋahari tu’ ŋagay’ kita’/ utay’ kә’ ditәsaw’ aku’ ŋagay’ kita’/ utay’ kә’ dibay’ aku’ ŋagay’ kita’//#]  [#aku’ ŋәmay’ kita’ tu’ tadi’ ŋalah ka pәrintah barisan nasional ŋambika kami’ nәmbiak tu’ tadi’ nusun pәŋidup әŋgaw atur kәna’ kitay’ bәǰalayka’ mәnua’ tu’ ŋәna’ ǰalay’ kә’ baru’//#]

[#nibuh disalah sida’ kitay’ әmpu’ ŋaga’ atur baru’//#]  [#ɲadi’ pia’ mih uŋgal/ әnti’ kitay’ dәka’  ɲambuŋ/ kita’ kә’ panday’ ɲambuŋ/ әŋgay’ kita’ ɲambuŋ pasaŋ bәsay’/ әŋka’ manuk әmpay’ digambir ba’ baruh rumah//#]  [#diŋa’ kita’ kaban kitay’ baru bian әmpat kali’ udah alah//#]  [#bәdaw’ ɲa’/ rәti’ ɲa’ sәpuh ija’ ɲu’ tuay sәtuay/ ɲu’ kәriŋ bulu’ ija’/ ɲa’ ija’ ɲu’ bulu’ tuay’//#]  [#ɲadi’ kitay’ tu’ tadi’/ lәbuh kitay’ dәka’ ŋatur diri’ ba’ bilik//#]  [#utay’ ti’ dikira’/ ukay’ tubuh mәnsia’//#]  [#kitay’ mәsti’ ŋira’/ bakani’ gaja’ bansa’ kitay’ taw’ bulih kuasa’/ taw’ ŋәna’ kuasa’ ŋulihka utay’ kәna’ kitay’ tu’ idup/ kәna’ kitay’ tu’ maǰu’//#]  [#bakani’ gaja’ ija’? naɲa’ kami’/ kami’ tu’ ŋәmay’ pәnәmu’ bakatu’/ ni’ pala’ tanah/ aku’ әŋgay’ ɲabut pasal tanah agi’ laban udah dilunǰak/ ɲu’ puas ɲa’/ lučak //#] 

[#taŋ kәbuah kitay’ naday’ pala’ tanah ɲa’ nagsuh kitay’ mәrinsa’ laban rәta’ kitay’ tu’ tadi’ dalam tanah//#]  [#әnti’ tanah ɲa’ tadi’ naday’ rәta’ kitay’ naday’ pәŋaja’//#]  [#bunuh oraŋ tәrus/ ambis čәrita’ ija’//#]  [#ɲa’ lay’ ija’ baka’ ɲa’//#]  [#iŋat kita’/ diŋa’ kita’ amat-amat/ aku’ ŋulaŋ ija’ baru’//#]  [#pәŋaja’ sәmua’ datay’ ari’ tanah/ kita’ taw’ naday’ duit taŋ sәagi-agi kita’ bis’i tanah/ kitay’ bansa’ әnda’ mati’//#]  [#laban tua’ nәmu’ bәtanam//#]  [#suba’ naday’ mih kitay’ duit/ nәmu’ mih tua’ bәtanam padi’/ ŋidup kәdiri’ mih tua’//#] taŋ әnti’ tanah ɲa ditarit oraŋ ari’ tua’//#]  [#kәsatu’ tua’ tu’ tadi’ naday’ pәŋәraǰa’//#]  [#kәdua’/  tua’ naday’ agi’ adat//#]  [#nama’ kәbuah aku’ ŋumbay’ naday’ agi’ adat? laban sәmua’ ada’t kitay’ bansa’ bәduduk ari’ tanah//#]

4.0 Simpul Penemu

Dikena nyimpul penemu ba kereja kus tu, kitai patut nemu nama kebuah bidang linguistik ti dukumbai fonetik enggau fonologi dipelajarka. Fonetik enggau fonologi nya dua pekara ti nyau  deka sebaka ari segi reti tang ngembuan bida ari pangan diri. Fonetik nya pansik munyi jaku ti diasilka organ artikulasyen lalu fonologi nya siti bidang  ti mansik sistem sekeda munyi dalam sesebengkah jaku mensia. Asil ari pansik ti udah dipejalaika, aku ulih nyidi bansa Iban ba sekeda endur bisi napi penanggul ba munyi vokal /a/ ti ukai glottis (sekeda endur ba Saribas enggau Kelaka) lalu penanggul ba munyi getar /r/ enggau lateral /l/ sereta leka jaku ti beujungka /r/ (Menua Batang Rajang).

Nengah pansik tu mega, aku pechaya genap pelilih menua tauka batang ai ngembuan tiun tauka rentak jaku ke enda sebaka sekalika tirur, laju, deras, kasar, tauka lembut. Ambika banding, jaku Iban Kapit enggau jaku Iban Betong ngembuan bida ke nyata kelebih agi ari sukut tiun tauka rentak jaku ti kasar tauka lembut. Kitai deka napi penanggul deka nentuka sekalika orang nya ringat tauka enda lebuh sida bejaku nitihka pelilih menua diri empu. Taja pia, tiun tauka rentak jaku tetap beguna laban tau ngayanka gaya pendiau orang, emosyen sereta empas jaku orang nya. Dalam kereja kus tu mega munyi jaku ke dirikod  deka diberi lambang tauka simbol ti disebut kitai lambang fonetik ti meri iya engkeman enggau tanya kereka kus.