Ngerami Pemujur Program Degree Bachelor Pelajar Jaku Iban

Kena 21 Januari 2016, Institut Pematih Pengajar (IPG) Kampus Rajang bisi ngatur pengawa makai beserumpu dikena ngerami pemujur Program Degree Bachelor Pelajar Jaku Iban ke bepalan ba Sheraton Restaurant di Sibu. Pengawa tu digulu Direktor IPG Kampus Rajang, bala pengelicha jaku Iban enggau semua nembiak ke ngambi kus major jaku Iban. IPG Kampus Rajang nyentukka diatu bisi ngelatih 157 iku nembiak ke ngambi kus major jaku Iban. Ari penyampau nya,  108 iku nembiak benung ngambi Program Degree Bachelor (Hons) lalu 49 iku agi bedau ba tikas foundation. Pengawa ngerami pemujur Program Degree Bachelor Pelajar Jaku Iban tu diatur beserimbai enggau meri basa ngagai Encik Raymond Gai Panting @ Gaie  ti ngetu ari mangku pengawa nyadi Direktor IPG Kampus Rajang. Nya alai pengerami tu mega dikena ngenang jasa sereta pengawa Encik Raymond Gai ti udah mayuh meri sukung ngagai pemansang sereta pengerembai Program Degree Bachelor Pelajar Jaku Iban ba menua Sarawak kelebih agi ba Institut Pematih Pengajar Kampus Rajang.