Kosmologi Raban Bansa Iban

Kosmos tu dunya ti alai semua utai di baruh hari tu bisi endur beatur-atur enggau betusun-tusun begulai nyadi siti. Kosmos is the universe regarded as an orderly and harmonious whole. Kosmologi tu penemu dalam senentang asal dunya nyadi ti bekaul engau tukuh dunya, kerepik-kerepik iya ti betabur di dunya luar ti beatur-atur lalu bisi adat asal diri empu. Cosmology is branch of philosophy with the origin and general structure of the universe with its part, elements and laws especially with such of its characteristics asspace, time, casualty and freedom. 

Sekeda anda tauka tebangkar madahka kosmologi tu siti bidang falsafah ti mansik asal penatai, proses enggau struktur rampa menua tauka alam semester. Kosmos reti iya perampa dunya lalu kosmologi nya pampang ti mansik sereta beratika penemu Iban senetang perampa dunya.  Raban bansa Iban nadai leka jaku ti bebagi dikena nyebut world, cosmos enggau universe. Nya mih kebuah kitai semina bisi dunya. Lebuh bejakuka kosmos raban bansa Iban, kitai ngena dunya Iban. Ketegal nya, kitai ngena kedua-dua jaku kosmos enggau kosmologi begulai lalu mai reti dunya. Nitihka jerita asal Iban, kosmos Iban beduduk ari pengawa empat iku raban Petara asal keterubah ngaga dunya. Sida empat tu benama Seregindah ke ngaga tanah ke bepah mayuh tunjang tumbuh kayu seribu guna, Seregindi ke ngaga ai ke diambi mali langkang tutu terusan ujan nyaya, Seregindit ke ngaga langit pisit padam matahari petang keleti ganti kelita, Seregindam ke ngaga malam ke tegayam sabung petang, pekat nungkat nereja. 

  

Raban bansa Iban arapka kosmos sida bisi empat iti dunya tauka lapis. Lapis ke paling atas sekali dikumbai dunya langit, nangkan ke nya dikumbai dunya baruh langit, ketiga iya nya dunya tanah ke dikumbai kitai bumi tauka dunya nyata lalu kepenudi sekali dunya baruh tanah tauka dunya sebayan. Taja pia, bisi sekeda bala pemansik magi kosmos raban bansa Iban ngagai tiga, lima lalu bisi datai nyentukka enam lapis. Nitihka orang putih, sida magi dunya mensia ngagai dua iya nya dunya dipeda enggau dunya enda dipeda tauka dunya semengat. Empat lapis kosmos raban bansa Iban tu tadi ulih dipeda kitai baka gambar di baruh. 

Lapis Kosmos Raban Bansa Iban

 

Dunya langit Dunya baruh langit Dunya tanah / bumi / dunya nyata Dunya baruh tanah / dunya sebayan

 Empat Lapis Kosmos Raban Bansa Iban

Kitai Iban selalu nyebut “menua kitai menua iya, menua antu, menua Petara” dikena madahka menua ba lalai entelah. Reti nya, kitai Iban agi mengkang begulai enggau bala antu sereta Petara sereta enda ulih diseraraka. Taja pan kosmos kitai Iban dibagi ngagai empat lapis tauka dunya ti bebida tang genap raban ke diau ba genap kosmos nya tadi bisi begulai, datai tauka ngundang sereta nulung pangan diri. Raban bansa Iban ba dunya nyata arapka Petara enggau nasit tauka tuah ti dikuasa tujuh iku Petara ke ngembuan tanggung pengawa diri empu. Enggau jaku pandak, taja pan Iban bebida kosmos enggau Petara tang Petara seruran ngemataka pengawa Iban di dunya tu. Nya alai semua kuasa, nasit enggau tuah ti dikemisi Iban diatur Petara.

Tuai ke pegari tampak rita ba kitai Iban selalu iya ditulung disukung Petara nengah kenyap, nengah mimpi tauka burung. Petara tauka bunsu antu tu suah nulung Iban ngena chara meri pengaruh tauka ubat ti ngasuh kering, berani, kebal, sigat, bajik, bulih padi, landik betenun enggau ke bukai.  Taja pan pengaruh enggau ubat ke diberi nya nulung sereta bisi guna ke manah tang bisi mega pengaruh nya jai. Ambika chunto baka pengaruh kena munuh orang, ubat ngasuh landik enchuri, sunti ngasuh orang enda ulih bejalai enggau jayau dikena ngulihka orang indu tauka lelaki.

Raban bansa Iban besai bendar pengarap ke kuasa mimpi, burung enggau chenaga. Apin Iban ngereja pengawa iya ngintaika mimpi ke manah ke tau ngujungka pengawa dikereja nya mujur. Semua orang ke pegari jelai berita ke ditemu bepun ari bisi mimpi ke nyemetak sereta manah. Semua tuai Iban ke disebut Mr. Benedict Sandin dalam bup Tiga Belas Bengkah Kuasa Mimpi ke dichelak Borneo Literature Bureau endang bisi mimpi magang ti ngasuh sida pegari. Raban bansa Iban mega andalka burung ti ngemai mayuh macham pesan. Kelimpah ari mimpi enggau burung, Iban mega arapka nasit ke disebut chenaga ti nguna atau babi kena macha pesan ari Petara ari kosmos ke bebida. 

Dikena bekangau tauka bekaul enggau Petara, Iban bisi ngintu mayuh macham gawai sekalika nya bepinta tauka meri terima kasih ngagai Petara. Ari pengawa begawai, Iban mesti bisi orang ke ngembuan penemu dalam senetang adat enggau tusun gawai. Ari nya mih raban bansa Iban bisi digelar orang lemambang ke tau nyampi, bebiau mengap, nimang, berenung, nimang jalung enggau ti bukai. Ari pengawa nya mega, pansut orang ke pandai dalam pengawa macha atau babi lalu nemu madahka reti burung ti dikumbai tuai burung.

Iban pechayaka bisi pengidup udah bekau mati. Semengat orang ke mati seruran segau – segau di dunya tu tauka terus mendam di dunya orang mati di Batang Mandai tauka Dunya Sebayan. Nya alai anang kitai ngumbai orang ke udah mati enda agi begulai enggau kitai ke agi idup taja pan udah diseraraka nengah lapis kosmos. Semengat Iban belabuh diau mendam di Sebayan lebuh suku juru iya di menua udah merantu iya ngena chara Gawai Antu tauka Ngelumbung. Pengidup baru di dunya Sebayan bekait bendar enggau pengidup ba dunya nyata tu. Sida di Sebayan bisi rumah lalu nguna perengka idup baka ke dikena kitai di menua nyata tu. Nya kebuah Iban meri baya lebuh numbakka orang ti mati lalu nirika sungkup nyadika rumah sida. Sebayan deka datai ngabang ngagai kitai mensia lebuh Gawai Antu tauka Ngelumbung.

Iya ke bendar kelia, Iban, antu enggau Petara agi begulai enggau pangan diri tang sida beserara laban ulah enggau pengawa sereta kosmos sida ti nyau enda sebaka. Asal Petara ulih disidi kitai ari peturun sida Raja Durung lalu Iban beserara ari sida Keling, Bunga Nuing enggau orang Panggau udah bekau sida Keling ke nyau enda dipeda agi. Sida iya nyau mulaika diri ngagai dunya baruh langit. Pia mega, Iban beserara pendiau enggau antu ba serak Telichu seduai menyadi iya Telichai lebuh Telichu ke bebali nyadi antu gerasi maya seduai iya begulai ngasu (peda ba tusut Beji). Ba serak ke dudi agi, bisi Iban jadi enggau antu, iya nya ba tubuh Gupie ti belakika Gerasi Belang Pinggang (peda ba tusut Sengalang Burung). Kaul jaul genap lapis kosmos ke dipejuraika penulis ba atas nya tadi ulih dipeda ba gambar di baruh tu.

Kaul Jaul Genap Lapis Kosmos Raban Bansa Iban

 

Dalam pansik tu mega nyengkaum penerang ke silik ngagai genap lapis kosmos bansa Iban sereta pengawa manang, lemambang enggau tukang sabak dalam kosmologi Iban. Taja pia, pekara nya enda dibantaika penulis dalam blog tu. Kita mega dipinta meresa lalu mansik dulu kereban sereta penerang dalam blog tu sebedau ngambi sereta nguna iya.