Pengalus Jaku

Asmah Haji Omar (2000), madahka pengalus jaku tu bekaul enggau pengawa bekenaka jaku besehari-sehari ti enda ngasuh orang ke ninga irau, ringat, enggau ensiban ati. Pengawa ti baka tu tau ngerapatka kaul orang ke bejaku enggau orang ke ninga.

Nitihka Fraser & Nolan (1981), nerangka pengalus jaku tu iya nya, lebuh berandau iya ke diguna orang ke bejaku enggau orang ke ninga ngambika dikena ngetanka kaul orang ti bekomunikasyen nya. Seduai mega bisi madahka pengalus jaku nya   “property associated with neither exceeded any right nor failed to fulfill any obligation”.

Sama bisi enggau mantaika penemu, Amat Juhari Moain (1992) ti madahka pengalus jaku nya pengeliut enggau pengalus lebuh ti bekenaka jaku, sekalika maya bejaku tauka nulis. Jaku ke dikena chukup beradat sereta ngembuan jaku basa. Jaku ti dikena ngembuan leka jaku ti alus dikena ngenataika penemu tauka pengasai ati. Kelimpah ari nya, Brown enggau Levinson (1987) ngasaika pengalus jaku nya chara dikena ngurangka  penyarut ba randau enggau orang ke ninga.

Lakoff (1975) mega bisi madahka pengalus jaku nya pengawa ti nyeliahka pengawa besengki runding enggau laya dalam interaksyen. Taja pia, Universiti Sumatera Utara ngetanka penemu ti madahka pengalus jaku nya sekeda apak jaku ti ulih ngangkat pengelandik emosi orang ti bejaku dalam komunikasyen, orang ke bejaku enggau orang ke mending ukai semina dipinta madah pengamat, tang patut ngembuan pengangkun ati dikena nyaga pengelikun kaul.