Bansa Jaku Dalam

Nitihka pansik aku bepelasarka mayuh bengkah sanding penemu, jaku dalam ke bendar amat pengeraup empat bengkah bagi jaku ti nyengkaum jaku sempama, jaku sema,  jaku silup enggau jaku dalam rama. Taja pia, enti ditisih enggau engkeman jaku dalam tau dibagai ngagai empat bengkah iya nya sempama, jaku karung, jaku dalam rama enggau jaku simbol. Ba baruh sempama kitai bisi sema banding, jaku silup tauka kelaung enggau lalau pendiau. Baka nya mega ba baruh jaku jaku simbol kitai Iban bisi pesindang, pelepa, temuku tali, tambai, ruding enggau terantang begau.

Kebuah semua sida tu tadi dikumbai kitai jaku dalam laban  jaku nya enda terus terang, tang belalai, besema, besilup, besuruk tauka bentelah. Pekara ke dipadahka ngena jaku dalam mega nyau kediri reti ari leka jaku nya empu. Jaku dalam tu iya nya jaku ti mar diperetika semadi mih kitai nyau mereti tauka belajarka reti iya. Ba penemu aku, enti kitai deka ngemanahka pengelandik diri bejaku Iban tauka deka meretika jaku nya enggau dalam, dia kitai mesti belajarka raban jaku dalam. Jaku dalam mega mandangka penyiru kitai Iban maya bejaku lalu dikena ngemanah jaku ngambika enda ngasuh orang bukai ensiban. Kelimpah ari nya jaku dalam mega ngembuan nilai estetika ti bekul enggau rampa menua ba pengidup raban bansa Iban.

3.1 Sempama

Nitihka jurai David Singleton (2000), sempama datai dalam tukuh leka jaku tauka rambai jaku ti tusah disagam ngena chara literal ari dijir leka jaku . Jaku sempama nya sebengkah ari gaya jaku ti dikena mantaika buah runding. Sempama Iban endang penemu asal ti amat manah. Orang kelia ke tajam runding suah ngumbai jaku sempama nya pemanah runding terebai (potted wisdom) tauka  penemu siku mensia ke ulih ari pemandai orang mayuh.

Sempama nya pengelandik dikena mensia bejaku, ngasaika pengamat, bejalaika pasal ajar enggau tangkan, dikena ngatur ulah enggau pendiau mensia sereta ngatur pengidup raban bansa diri enggau ke bukai. Sempama mega dikena orang ti landik berunding ninggalka penajam penemu diri ngagai anak, uchu enggau ichit sida. Ari asal kelia, mensia rindu agi nguna sempama ke pandak, laban nya rumpas agi dikena lebuh berumban. Bansa Iban besempama kena belapikka jaku ngambika iya tau mangka pemaiulah enggau pendiau siku-siku mensia ngena chara ensuruk tang nyemetak.

Nambahka nya sempama mega dikena ngambika orang ti kena empas jaku rara tauka sindir enda berasai ensiban sereta dikena ngayanka penalam sereta pemesai basa ngagai pangan diri, temuai pia mega sebarang orang bukai. Bisi mega sekeda sempama dikena nerangka gaya utai ke enda ulih peda ti semina ulih diasaika baka ribut tauka pangka biaubalai sereta utai ke semuti ulih dinga baka auh ujan, depur guntur, seru nyawa antu, gugu penerebai burung enggau utai bukai ke beribu leman.

Sempama kitai Iban endang sigi udah bisi sereta majak nambah kenyau ari beribu-ribu taun ke udah. Ari nya, nama penengkebang tauka pemun sempama enda ulih temu sereta enda ulih sidi agi. Pekara ke suah disempamaka kitai nya nyengkaum pengasai ati mensia, gaya pengidup, pendiau enggau ulah sida, gaya rampa menua enggau utai ke nyadi ba kandang pendiau  bansa Iban ke dulu suba sereta peturun sida nyentuk ke seharitu.

Baka ke ditemu kitai, asal sempama ukai sebengkah aja. Bisi sempama tu ditengkebang mensia ke idup begulai dalam mayuh tikas pengidup baka orang kaya, mensia ti tinggi pangkat, sida ti nyadi pengarang bup tauka berita, sida ti landik bejaku, raban lemambang, tebangkar jaku Iban enggau raban bansa Iban ke bukai. Sempama endang diangkatka ari daya idup Iban enggau bansa bukai ke diau besaruk enggau sida tauka ari penemu bansa bukai ke bisi kena dinga enggau bacha sida. Nya ke alu ditunda dikena ari kelia datai ke sehari tu.        

3.1.1 Sema Banding

Baka ti udah dilansa aku dulu agi ari tu, sema banding tauka jaku sema nya sebagi ari sempama. Taja pia, iya ukai jaku sempama tulin enti nitihka reti iya dalam jaku Iban laban nya semina jaku dikena nyemaka gaya utai ke deka diterangka ngagai peninga. Kebuah ti kedua, laban jaku sema selalu nyemetak nyebut gaya utai ke endur kitai nyemaka utai nya lalu nadai belalai tauka bentelah. Tang kebuah jaku sema tau dikumbai jaku dalam laban iya mega ngembuan reti kediri empu ti dalam sereta menyana. 

Jaku sema suah bepun enggau leka jaku baka, asai enggau munyi. Ambika chunto, jaku sema ke bepun enggau baka: baka buyah ti nabakka diri ke api. Reti iya chukup terang iya nya bulih pemedis laban namaka diri ba laya orang. Jaku sema ke bepun enggau asai: asai ke lenyau gupung balung lawang. Jaku sema tu mega endang chukup terang sereta nadai belalai iya nya merampau dikejangka ambai mindah jauh.. Lalu chunto jaku sema ke bepun enggau munyi baka tu: munyi injin jait. Jaku tu pan nadai belalai lalu nyengenda amat dikena nyemaka penyampat utai. Chunto iya dalam ayat: “amat tak munyi injin jait manuk unggal dua iku nya bebintih enggau pangan diri”.

3.1.2 Jaku Silup / Jaku Kelaung

Jaku karung tauka jaku silup tu bebida ari jaku sema ke udah dikenang kitai dulu agi ari tu tadi. Kebuah pia, laban jaku silup tu bisi belalai tauka bentelah lalu ukai baka jaku sema ke alai utai endur nyemaka nya ulih dipeda, didinga tauka diasaika. Jaku silup suah enda berambai, enda betimbal  lalu kadang-kadang ka seleka dua aja. Reti leka jaku tu deka mudah ditemu kitai enti disalin seleka – seleka  tauka sepemanjai luntang iya. Ambika banding: ka ngabas rau ba sungai nya. Kitai deka napi penyaru enti enda berundingka silup jaku ‘ngabas rau’ lalu kitai tau ngumbai luntang jaku nya madahka orang ti bejaku nya deka mansang ke sungai meda rau. Tang reti ke bendar jaku silup nya tadi madahka diri deka berikan ba sungai nya.

Jaku silup tauka jaku kelaung tu suah dikena ba menua ke agi latung tauka agi kudi awakka pejalai kitai ti begiga enda jelungan tauka regu. Kitai mega suah ninga orang besebutka jaku munyi tu maya merau: “ngiga kerangan menyana agi unggal, endur kitai sebuat nekuka lengan dulu. Nyau nadai agi puak engkubung tu”. Nuan deka nyagam jaku nya tadi ngemai reti ‘melekuka lengan ba siku’ enggau ‘kayu engkubung nya ambis puak’  enti nuan semina meretika reti leka jaku nya ke amat tauka nuan empai kala ninga tauka enda nemu jaku silup nya tadi. Ke bendar amat, reti (entelah) jaku kelaung nya tadi  “makai” enggau “lapar”. Dua bengkah jaku nya tadi mali disebut ba sungai tauka endur ke mayuh baya enggaika kitai puni lalu tau ngujungka dianu baya.

Kitai mega ngena jaku silup tauka jaku kelaung maya berandau enggau pangan diri ngambika enda bangat kelalu mantang orang ke ninga sereta ulih ngayanka basa kitai bejaku. Ambika chunto baka ‘betubuh bisi’ dikena nyebut indu ke ngandung, ‘basah jari’ dikena ngelaungka orang ti udah bedengah munsuh enggau ‘tebal pending’ dikena nyilup orang ke tan ngenatka jaku bantah orang. Kitai enda terus nyebut indu nya ngandung tauka orang nya udah bedengah laban nya kelalu mantang sereta enda nyamai didinga kelebih agi ba mua bala mayuh.

3.1.3 Lalau Pendiau

Lalau pendiau iya nya jaku ke suah dikena meri lalau tauka ajar ngena chara ti lembut tauka enda kasar ngagai orang bukai sekalika nembiak tauka orang besai tuai. Lalau pendiau suah dikena meransang, ngambika orang nya bebendar agi ngereja pengawa. Ambika chunto baka: agi idup, agi ngelaban. Lalau pendiau ti baka tu balat meri perangsang tauka ngapika orang nya ransing sereta bebendar agi nurun beperang tauka ngayau.

Lalau pendiau mega dikena meri lalau tenggau ti menuku ngagai pengidup kitai mensia. Ambika chunto baka: agi bekulit agi bedaki, ti suah dikena meri jaku ajar  ngagai orang nya ngambika rajin  bekereja awakka semampai bulih utai lalu enda merinsa pengidup jemah ila. Kelimpah ari nya, lalau pendiau mega dikena bepesan ngagai orang ti benung ba jalai alun tauka diau ba menua orang ketegal bekereja. Ambika chunto baka: berumban belaban bemalam rantau jalai, jamah belubah nya ke tumu datai. Pesan ti baka tu ngambika orang nya enda kelalu berumban maya masang  entukar tauka motosikal ba jalai alun ti tau ngujungka iya ngaga penyilap lalu bebadi.

3.2 Jaku Karung

Jaku karung iya nya jaku ti berambai dikena ngemanahka rurun leka jaku ke bebungai sereta besenimbal. Jaku karung tu nyerangkung sempama, jaku silup, jaku kelaung, jaku sema, jaku sebar enggau leka main ti bukai. Tebal agi iya  suah dikena ba mayuh leka main Iban baka ba entelah, jaku melah pinang, pengap, ramban enggau ti bukai. Jaku karung mega bisi dikena maya madahka diri nadai burung tauka jai mimpi, muji sereta ngela nama orang enggau madahka orang ti berani. Uji kitai sama bela beratika sekeda ari chunto  jaku karung ba Gerim 1.1

Jaku karung	Penerang
Pedang panjai enggi apai Sempurai Gundai, Enda berupai abi patah, Isau kayau enggi apai Sempurai Ajau, Enda berupai ngayau ngalahka rumah.	Entelah ti ngelalaika ‘bangkang dipalu orang’.
Lalang kunda wa, Aih …. Lalang kunda wa, Lain pisin anta sida aya pungga, Kena renggam jam tangan meh ka kiba, Dikena iya antin, Dikumbai iya manah dipeda, Tang gamal pungga baka antu kamba, Enda ampit pemakai.	Ramban mejah pisin lelaki
Laban enti maya hari gawai besai dudi orang matak kami ke tu dulu orang matak kita ke nya ngagai panggau atas padung laban kita endang teleba nyabung ngirup jalung timang lemambang	Jaku karung dikena madahka orang ti berani.

Gerim 1.1 Chunto Jaku Karung

3.3 Jaku Dalam Rama

Siti ari sapar jaku dalam ke jarang ditemu kitai iya nya jaku dalam rama. Leka jaku tauka rambai jaku ke dituruka dalam raban tu ukai jaku sempama tauka jaku sema, sekalika jaku silup, tang sida tebalan disebut enggau dikena ba pengidup kitai raban bansa Iban. Jaku dalam rama ngembuan reti kediri empu ti mar deka diperatika kitai ke rapas peneleba, pengelandik enggau penemu pasal semua sapar daya idup raban bansa Iban. Tebal agi jaku dalam rama tu endang nama utai. Ngambika terang agi, uji peratika chunto ba baruh tu:

1.    Tebalu mansau – adat tebalu ke dikeluraka balu maya merantu tauka nyungkup tauka ngelumbung bini tauka laki ti udah mati.

2.    Bubut balu – bubut ke bemunyi nadai timbale maya dini hari.

3.    Pusat bedus – sebansa anyam simpai sarung ilang ti bepusar baka pusat jelu bedus, ke digaga ari lambar rutan tauka resam.

4.    Balu betudung – tanduk rusa ke dibungkus bulu iya empu ti nyadi ubat kebal enggau pemampul bedil.

3.4 Jaku Simbol

3.4.1 Pesindang

Sebut aja pesindang, tentu mayuh kitai rebak baru enda nemu nama utai nya. Pesindang ke bendar amat repik kayu ti diselitka baka gaya urup x ba abi tibak ba batang kayu tauka ba kayu ti dientakka ba tanah. Pesindang endang ngembuan guna ba pengidup kitai bansa Iban kelia.  Bansa Iban ngaga pesindang dikena sida nanda simpang jalai peti tauka endur  ti mali dipasuk tauka ditengah baka ba umai ti baru udah pemali. Pesindang mega dikena kitai Iban kelia nanda ambu pasal temuda ti nyengkaum pun buah, manyi, kayu deka ditebang ke ramu tauka ke perau enggau ke bukai.  Ambika chunto, “Uji gaga ke pesindang ba pun perawan ti deka diban nuan nya unggal, ngambika orang enda nebang iya sebarang”.  Ari pesindang ke digaga nya tadi, dia orang bukai enda berani nebang pun perawan nya laban nemu nya udah bisi orang ngambu dulu.

3.4.2 Pelepa

Taja pan nyau deka sebaka enggau pesindang, tang pelepa tetap ngembuan bida iya ari pesindang. Pelepa iya nya daun idup tauka pua kumbu tauka utai bukai ti digitang manang ba pala pintu orang ke udah dipelianka iya kena madahka bilik nya mali dipasuk temuai dalam kandang pemali. Chunto iya dalam ayat: “Pelepa manang udah dibuat laban timpuh pemali udah genap tiga hari”. Pelepa mega digaga ari daun kayu, akar  tauka kayu ti diselitka ba abi tibak dikena nyadika tanda rara, tagang tauka pemali. Kitai ulih meda chunto tu ngambika terang agi: “Kerang tebelian nya udah aku peleba ngambika orang enda ngambu iya”. Lebuh orang ti mansa kerang tebelian nya,  sida lalu nemu kerang tebelian nya udah bisi orang ngempu maya tepedaka pelepa nya tadi.

3.4.3 Temuku Tali

Sebedau bansa Iban bekenaka surat  tauka perengka ICT baka kemaya hari tu, kitai Iban kelia endang bepanggai amat ba temuku tali dikena ngaga semaya. Temuku tali iya nya tali ke disintal dikena ngaga semaya timpuh pengawa baka gawai, ngayau, nyabung, nubai enggau ke bukai. Siti sintal nya dibuka tiap-tiap hari nyentuk ngagai timpuh pengawa nyadi. Temuku tali tu tadi disadung tauka dianjung ngagai kaban belayan enggau orang bukai ti dikemeratka ati diambi ngabang tauka dibai besaup ngereja pengawa nya. Agi kelia, sebedau orang nemu macha surat pekirum, temuku tali ditanchang ba kerat kayu dikena perintah manggil orang datai ke opis, bechara tauka kebuah bukai ti berat.

3.4.4 Tambai

Tambai ba sapar jaku simbol enda sebaka enggau reti tambai tauka menira ti digitang ba sekula enggau opis perintah. Tambai ke bendar amat dikena nanda rumah  ke mali ditiki temuai ketegal bisi ditinggang penti pemali. Tambai tu suah digaga ari gerempung daun kayu idup ke digantung ba pala tangga setak-setak rumah. Kain enggau chapak dituat enggau kayu ba pendai enggau jalai nuju ke rumah. Enti penti pemali enggi orang sepintu aja, gerempung daun idup tauka daun buluh tauka kain kanggan sunting kapu digantung  ba mua pintu bilik. Kelimpah ari nya, tambai mega dikena nanda umai mali ditengah sepengudah dipemali, tisi tauka sukut umai dipelepa enggau daun idup. Uji peratika chunto ayat tu: “Rumah panjai sida Nanding mali ditiki temuai, laban bisi dituatka sida tambai ba pendai”. Sepengudah meda tambai ba pendai nya tadi, kitai nemu rumah panjai sida Nanding bisi ditinggang penti pemali lalu mali ditiki.

3.4.5 Ruding

Ruding nya rengka main kitai Iban kelia  ti digaga ari temaga tauka aping. Ruding ditebah ba tangkup mulut dikena bujang enggau dara bejaku pasal pengerindu enggau pangan diri. Gaya tukuh ruding selalu digaga mit, mipis sereta lurus. Ba ruding mega bisi papan, dilah, pala, genaling, sempulang enggau punggang. Baka ke ditemu kitai, ruding endang mayuh bansa baka ruding kachai, ruding kachu enggau ruding inang. Chunto jalai kitai ulih ngena leka jaku ruding ba ayat: “Maya ke agi bujang dara kelia, suah amat bala kitai sebuat betebahka ruding dikena madahka pengerindu enggau pangan diri”.

Bisi mega penemu ti madahka ruding tu suah dikena bansa penan. Tang ba sida bansa penan, ruding dikumbai sida ‘oreng’ sereta selalu ditebah sida lebuh maya lepa. Ruding tu mega suah dimainka indu bansa Penan dikena madahka pengaga tauka penusah ati diri. Kelimpah ari nya ‘oreng’ mega dimainka enti nyema bisi temuai datai. ‘Oreng’ tu bisi tusah mimit ditebah enti enda ngembuan pemandai lalu begunaka penemu bemain ngena dilah enggau mulut. Nitihka penemu orang Penan, ‘oreng’ semina ulih dimainka indu aja lalu enti nya dimainka lelaki, nya tau ngasuh sida tesat dalam babas.

3.4.6 Terantang Begau

Terantang begau begunaka tawak ti dipangkung besai ke tanda bisi penusah besai nyadi lalu pinta sah enggau jampat. Lebuh ninga terantang begau, orang lalu berumban datai ngesah utai ke nyadi. Orang Iban kelia deka mangkung terantang begau lebuh bisi penusah besai lalu minta sah tekala nya baka enti rumah dialahka munsuh, rumah angus enggau orang bisi ditangkap baya. Ukai mina nya aja, terantang begau mega dikena maya madahka bisi pemati tauka rabat, orang kena pangka kilat, orang kena tabanka tanah tusuh, kena ampuh bah, orang bisi lemas, kena serang kayau enggau mayuh penusah ke bukai.

Terantang begau enda bula nyelai didinga  kitai ke rebak baru kemaya ari diatu, tang iya cukup ngasi dikena ba raban bansa kitai Iban empu dulu kelia. Ambika chunto, lebuh tanda panggil nya datai ba sebuah-sebuah rumah, dia bala manuk sabung enggau bala pungka laki tauka orang ke kena tuju tesau nya enda tau enda nyendiaka diri ngena ngepan sereta siap enggau senjata perang sida, baka terabai, sangkuh, nyabur, gansai, sumpit, ipuh, pemalu beduri, pedang, ilang, sereta keresa bukai ke dikena lebuh maya besatup enggau bala munsuh. Baka nya mega, enti orang nya sigi udah ditemu lama sakit, nama orang bisi ninga terantang setawak panjai tiga kali bejurut, reti nya orang ke sakit nya udah ngapuska seput. 

Terantang begau ukai sebansa aja, tang mayuh bengkah munyi laban sebengkah nya ngayuka sada ke enda sebaka reti. Ngambika banding, enti terantang panjai enda ngetu, nya reti iya madahka bisi penusah besai minta bantu tauka sah tekala nya sereta chukup beguai. Terantang begau mega enda tau dipangkung sengapa enti nadai kebuah enggaika orang begau lalu datai ngesah ngapa. Orang ti mangkung terentang begau sengapa nadai kebuah ulih kena ukum.