RANTAU ANDAU

Wednesday, 25 May 2016

Pengerami Ngelancharka Program Degree Bechelor Pengajar Jaku Iban enggau Simposium Jaku & Litaricha Iban

Pengerami ngelancharka Program Degree Bachelor Pengajar Jaku Iban Sekula Primari ti diatur Institut Pematih Pengajar Kampus Rajang, Bintangor dipenyadika Datuk Patinggi Tan Sri Alfred Jabu anak Numpang, Sapit Kepala Menteri Menua Sarawak kena 5 haribulan September 2014. Serimbai enggau nya, iya mega bejadika Simposium Jaku enggau Litaricha Iban ke diatur kena 5-6 haribulan September 2014 ba Hotel RH Sibu.

Tuju pengerami ngelancharka Program Degree Bachelor Pengajar Jaku Iban Sekula Primari nya ngambika bala mayuh nemu jaku Iban udah bisi dipelajarka nyadika kus major ba tikas degree bachelor di Institut Pematih Pengajar (IPG). Raban keterubah iya deka nembuka pelajar sida ujung taun 2016. Kelimpah ari nya, Simposium Jaku Iban enggau Litaricha mega diatur nagmbika ulih nyungkakka penemu engau pengelandik profesional nengah pengawa pansik, pengawa mantaika keretas jurai, pengawa nulis enggau nyelak karang akademik; bejuraika isu ti bekaul enggau pengawa ngemansangka Litaricha enggau Jaku Iban dalam konteks pelajar ke maya hari; enggau ngemeratka kaul intelaktual entara IPG enggau IPTA sereta NGO ngambiak sama begempung ngemansangka pelajar Jaku Iban.

Maya pengerami ngelancharka Program Degree Bachelor Pengajar Jaku Iban, Rektor Institut Pematih Pengajar Malaysia, Tuan Sulaiman bin Wak enggau sekeda Direktor Institut Pematih Pengajar Malaysia sama bisi datai, kelimpah ari bala pemesai opis perintah, opis pelajar enggau bala ketuai raban bansa. Bisi 400 iku orang datai ngulu pengerami nya.

Beserimbai enggau pengerami ngelancharka PISMP Jaku Iban, Institut Pematih Pengajar Kampus Rajang mega ngatur Simposium Jaku Iban engau Litaricha begulai enggau Gerempung Pemansang Pelajar Jaku Iban (AEDIL) ti belalauka sulu jaku "Daya Idup Intelektual Pengerais Pengelati Jaku enggau Litaricha" berengkah ari 5 - 6 September 2014 ba Hotel RH, Sibu. Simposium nya dgulu 200 iku orang nyengkaum sekeda bala pengelicha Institut Pematih Pengajar IPG) menua Sarawak, pengajar jaku Iban enggau kaban Gerempung AEDIL sereta bala pengajar pelatih Program Degree Bachelor Jaku Iban ba IPG Kampus Rajang.

Tuesday, 24 May 2016

Woksyop Nulis Kreatif enggau Dokumen Rasmi Jaku Iban

SARIKEI: Seraban 64 iku orang nyengkaum pengelicha, staf sukung, enggau bala pelatih Institut Pematih Pengajar (IPG) Kampus Rajang bisi ngulu Woksyop Nulis Kreatif enggau Dokumen Rasmi Jaku Iban ke diatur sepengelama dua hari ba institut nya kemari.

Pengawa ti besuluka rambai jaku 'Jaku Iban Maju Nyerumba Singkang Pemansang' nya dikenataika Dr. Jeneri Amir, siku pengelicha kanan ari Universiti Malaysia Sarwak (UNIMAS).

Tuju bengkel nya dikena mantaika lebas jaku sereta ngayanka pengalus basa dalam jaku Iban ba mayuh bengkah pekara. Kelimpah ari nya, iya mega dikena nyungkak penemu enggau pengelandik nengkebang ngena jaku Iban.

Kereja Latih Jaku Iban Sekula Primari

Dalam proses ngajar enggau belajar, pengajar patut nyediaka kereja latih ti seriran enggau tikas pengelandik nembiak sereta topik enggau standard pelajar sehari nya. Kereja latih tu beguna dikena nentuka sekalika objektif pelajar sehari nya ulih dijapai tauka enda. Kereja latih mega beguna dikena nentuka bagi nembiak ti patut diberi seridi enggau pengaya. Nembiak ke ditemu enda ulih tauka enda tetitih kerejalatih selama ke diberi pengajar deka diberi latih seridi ti besenipak enggau pengulih nembiak nya empu. Kebuah pia, ngambika pengelandik ke diajar nya tadi ulih dijapai nembiak ti kurang nya. Kereja latih ke diberi nya tadi patut ditumpuka ngagai bidang pelajar nembiak ti lemi tang anang lari ari standard pelajar tauka objektif pelajar.

Pengaya iya nya kereja latih tambah ti tau dikena nangkir ajar ngagai ti mar tauka dalam agi bepelasarka aktiviti tauka latih selama ke diberi ngagai nembiak. Tuju ke meri latih pengaya ngambika ulih ngerembaika penemu enggau peneleba sereta ngukuhka pengelandik siku-siku nembiak. Ngena kereja latih pengaya tu, nembiak diberi peluang tambah alai sida tau ngerembaika pengerindu, daya kreativiti enggau inovasyen, peransang deka nemu, pechayaka diri empu enggau tau bisi semengat nyadi ketuai ti ulih dikarapka. Nya alai, kereja latih pengaya patut mar agi ari latih selama lalu ngembuan tikas tanya ke tinggi agi dikena nguji penajam pikir nembiak lalu enda tak semina senaka proses pengingat aja. Ba baruh bisi chunto kereja latih ke dikena penulis maya ngajar subjek Jaku Iban ti mungkur latih selama, pengaya enggau seridi bepelasarka siti topik tauka SP ti udah dipilih.

1. Kereja Latih LPS 13 Primari 4

2. Kereja Latih LPS 9 Primari 3

Dokumen Kurikulum Standard Sekula Primari (KSSR) Jaku Iban

Dokumen Kurikulum Standard Sekula Primari (KSSR) tu dokumen ke ngaraka kurikulum enggau turai pelajar jaku Iban. Dokumen tu endang ditempa nitihka peneka sereta semengat ‘Falasafah Pendidikan Kebangsaan’. Dokumen tu mega ngaraka langkah rapat ngajar enggau belajar ke nyengkaum mayuh bengkah aktiviti. Mata pelajar Jaku Iban ngembuan juluk deka nyikap nembiak ngemeranka pengelandik berunding tikas tinggi ngambika sida ulih mujur nyatup arus globalisasyen sereta ekonomi bepelasarka peninggi tikas penemu ba abad ke 21.

1. KSSR Jaku Iban Tikas 1
2. KSSR Jaku Iban Tikas 2
3. KSSR Jaku Iban Primari 4
4. KSSR Jaku Iban Primari 5

Keretas Peresa Jaku Iban Sekula Primari

Keretas Peresa Jaku Iban ke disediaka penulis ba baruh nyengkaum Primari 2, Primari 3, Primari 4 enggau Primari 5. Keretas peresa tu disediaka penulis dikena nisih nembiak ti ngambi subjek Jaku Iban ba ujung penggal 1/2016. Nya alai, keretas peresa tu ditempa penulis nitihka topik sereta pengelandik ti udah diajar sepemanjai penulis praktikum sepengelama 3 bulan ba SK Nanga Machan, Kanowit. Enggau nya, bala pemacha semua dipinta meresa dulu kereban ba baruh sebedau ngambi sereta nguna iya. Terima kasih.

1. Keretas Peresa Jaku Iban Primari 2
2. Keretas Peresa Jaku Iban Primari 3
3. Keretas Peresa Jaku Iban Primari 4
4. Keretas Peresa Jaku Iban Primari 5

Pages - Menu