Terminologi Jaku Iban

Penatai Terminologi Jaku Iban

Bepelasarka pansik aku ngagai 25 iku responden, ketebal agi tauka 88.8 peratus responden besetuju madahka sida mayuh ngena jaku bukai lebuh sida berandau tauka bejuraika penemu. Kebuah pia, ngambika penemu ti dibantaika nya senang agi diperetika orang bukai lalu mujur teulihka respon ti manah. Nambahka nya, pengawa ti bekenaka jaku bansa bukai ba komuniti Iban endang udah lama tauka bisi dikembuan ari suba. Ari segi sejarah, jaku English mayuh udah berasuk enggau jaku Iban kenyau ari jeman Rajah ti megai menua Sarawak. Nya alai, polisi nginjau dalam jaku Iban lebih berat agi menatika jaku English ti endang nyadi ke ‘lingua-franca’ ti entap agi dikena dalam komunikesyen entarabansa. Taja pia, jaku seperugan ti mungkur jaku etnik ti engkeman enggau daya idup Iban mega dikenatika lalu diinjau dalam jaku Iban ke pengaya jaku Iban.

Atur Penempa Terminologi Jaku Iban

Terminologi iya nya leka jaku tauka sakum leka jaku ke terang dikena nerangka reti, konsep, proses, situasyen enggau penteba sesebangkah bidang. Ambika chunto baka leka jaku fotosintesis, sintaksis, fonetik enggau ti bukai. Kitai mega ngembuan atur terminologi dikena nempa iya lalu atur nama dikena nentuka nama sesebangkah pampang. Kelimpah ari nya, bisi mega terminologi menyana iya nya reti leka jaku ke spesifik nitihka bidang lalu terminologi rama nya leka jaku selama ti dikena maya bejaku. Iya ulih nyadi terminologi menyana baka chunto tu: tukang nyadi tukang wang.

Morfem iya nya unit ti pengabis mit ba jaku ke negmbuan reti enggau fungsyen jalai jaku. Morfem terminologi nya urat jaku enggau penambah ke dikena nempa terminologi. Proses nempa terminologi jaku Iban iya nya nengah jalai meri penambah, betandu enggau bejantilka. Pelasar jaku engau urat jaku nya leka jaku ke bedau nengah proses penambah baka leka jaku rumah, tinduk enggau ti bukai.  Penambah nya morfem ke dikena kitai nempa terminologi nengah proses penambah baka me-, be- enggau ti bukai. Iban mega nempa terminologi nengah proses betandu ti ngulang urat jaku sekalika penuh tauka sebagi dikena nempa terminologi. Ambika banding, baka leka jaku besai-besai tauka bebesai. Kelimpah ari nya, kitai mega bisi bejantilka dua tauka lebih leka jaku dikena nempa terminologi baka leka jaku bumiputera enggau ke bukai.  

Ba dalam nempa terminologi jaku Iban, kitai bisi ngembuan tukuh prototaip iya nya leka jaku ke agi ngetan ke tukuh asal iya baka protein, drama, flora enggau ti bukai.  Kitai mega bisi paradigma leka jaku iya nya raban leka jaku ke digaga ari urat jaku ke sama ngena penambah tauka jantil leka jaku. Dalam proses nginjau jaku bansa bukai, kitai bisi empat chara iya nya injau terus, injau salin, injau pengasai enggau injau serap. Ba proses injau terus, leka jaku diambi sereta diterima enggau silik ari jaku asal. Reti nya nadai berubah ari tukuh sepil enggau reti taja pan disebut nitihka kaul dilah jaku Iban baka leka jaku bebas, standard enggau bank. Taja pia, injau salin begunaka mali leka jaku ti disalin nya ngagai jaku Iban. Ambika chunto baka leka jaku honey moon disalin ngagai bulan madu lalu five foot way disalin ngagai kaki lima.

Bebida ari atur bukai, nengah atur injau pengasai leka jaku ti diinjau lalu disepil nitihka pengentap sepil jaku Iban ti udah ditetapka. Sekeda urup dalam leka jaku ti diinjau berubah nitihka penemban urup lebuh disebut tauka disepil dalam jaku Iban. Chunto iya baka leka jaku system disepil sistem lebuh ‘y’ betukar nyadi i nitihka sebut (vokal) lalu bomb disepil nyadi bom lebuh konsonan sengian ‘b’ ditingkilka. Dalam kategori atur injau serap, leka jaku ti diinjau endang udah entap sereta masai dikena dalam jaku Iban. Berindik ari nya, semua leka jaku ti diinjau sera penda nyengala menatika gaya tukuh visual leka jaku nya ditulis dalam jaku asal ti alai nginjau. Ketebal agi sepil iya ditulis nitihka munyi ke disebut ngena kaul dilah Iban baka apple nyadi ipul, ball nyadi bol lalu bicycle nyadi basikal.

READ MORE - Terminologi Jaku Iban

Nembiak UPSI ke ngambi Jaku Iban deka dibantu

KETAS DULU: Jabu dipebasa ngetas riben dikena meri basa ngagai iya raun ngagai ruai pemandang.

Sida ke ngambi mata pelajar Jaku Iban ba UPSI diperansang pratikal di Sarawak 

SAPIT Kepala Menteri Sarawak Datuk Patinggi Tan Sri Alfred Jabu Numpang seiku ketuai politik ke chukup siruka jaku bansa diri sereta ransing meri sukung ngagai nenama aja program ke bisi besangkut paut enggau pengerembai pemansang jaku Iban.

Rambau ke bejadi Progam Ijazah Sarjana Muda Perguruan (PISMP) Bahasa Iban enggau Simposium Bahasa Dan Sastera Iban di Sibu, apin lama ke udah Jabu bisi madahka diri deka ngemansutka belanja ari kuchik iya empu dikena nyaup bala nembiak ke bisi nampung pelajar dalam Jaku Iban ba Universiti Pendidikan Sultan Idris (UPSI) nyema sida deka pratikal ba nengeri tu.

Tuju Jabu ngaga pemutus bansa nya, ku iya laban ba menua Semananjung din nadai sekula ti ngajar Jaku Iban, nya alai nembiak ari UPSI enda tau enda pratikal ba sekula di nengeri Sarawak ditu empu.

“Aku udah ngemendarka semua bantu belanja ti bekaul ngagai bala nembiak ari UPSi ke bisi ngambi pelajar Jaku Iban awakka sida ulih pratikal ba nengeri tu,” ku iya.

Nangkan ke nya, Jabu madah mata pelajar Jaku Iban udah diajar ba UPSI Tanjung Malim, Perak kenyau ari taun 2010 dikena ngambuh bala pengajar awakka ulih ngajar Jaku Iban ba Sarawak.

“Tu seiti ari tanda basa orang ngagai Jaku Iban ngambika sebaka tikas enggau jaku Mandarin enggau Tamil ke bela bisi diajar ba universiti,” ku tandu Jabu.

Bela bisi bejaku rambau pengawa tu iya nya Direktor IPG Kampus Rajang Raymond Gai Panting madahka, laban PISMP Bahasa Iban agi baru dirandang nyadi IPG Kampus Rajang meseti bekempit enggau institusi palan belajar ti bekaul ke bukai ba tuju ngangkatka ngerembaika pemansang Jaku Iban seririh enggau peminta tikas Kaunsil Akreditasi Menua (MQA).

“Kitai deka bekempit enggau Universiti Malaysia Sarawak (UNIMAS), Opis Pelajar Nengeri Sarawak, Universiti Pendidikan Sultan Idris (UPSI), Yayasan Tun Jugah, Gerempung Pemansang Jaku Iban (AEDIL), Yayasan Kebudayaan Dayak, Kaunsil Penusun Adat enggau institusi ke bekaul ke bukai.

“Ba tuju ke sebaka mega kitai udah tu deka ngatur Simposium Bahasa enggau Sastera Iban,” ku iya madah.

Berebak enggau tu mega Sulaiman madah, PISMP deka nempa pengajar ukai semina nitihka peminta penyampau pengajar ba sekula tang pengajar ti ngembuan pengelandik nitihka Outcome Based Learning (OBE) ti udah ditetapka.

“Kitai mega ngarapka pengajar Jaku Iban ari program tu ila bela begempung bejadi Pelin Pemansang Pelajar Malaysia,” ku iya.

Sulaiman mega madah, Simposium Bahasa enggau Sastera Iban sebengkah ari chunto kerejasama entara IPG Kampus Rajang nyadi pemungkal PISMP Jaku Iban enggau institusi pelajar ti bekaul dikena ngerembaika agi jaku Iban.

Kelimpah ari nya, ku iya, nembiak ke enggau PISMP Jaku Iban patut berasai temegah ati laban diberi awak ngambi bagi ba program keterubah iya diatur nya. Pengerami tu amat keterubah iya diatur begulai Palan Pematih Pengajar (IPG) Kampus Rajang enggau Gerempung Pemansang Pelajar Jaku Iban (AEDIL). IPG Kampus Rajang nyadi IPG ti keterubah bisi PISMP enggau opsyen Jaku Iban lalud iatu bisi 83 iku nembiak belajar ngambi program nya.

Nangkan ke nya, taun tu IPG Kampus Sarawak, Miri nunda singkang IPG Kampus Rajang lalu udah nerima 15 iku nembiak. Berindik ari penyampau nya, nengeri tu diatu udah bisi 98 iku nembiak ke deka bulih graduet ba mata pelajar Jaku Iban ti deka ngajar ba sekula primari. Beserimbai enggau pengerami sehari nya, bala nembiak IPG Kampus Rajang bisi mantaika mayuh bengkah tanda.

Kelimpah ari nya, Jabu enggau pemesai ke bukai dibai raun meda program pemandang ke bela bisi diatur sepengudah tembu pengerami sehari nya. Bela bisi datai maya tu iya nya Rektor Institut Pendidikan Guru Malaysia Sulaiman Wak.

Read more: http://www.theborneopost.com/2014/09/21/nembiak-upsi-ke-ngambi-jaku-iban-deka-dibantu/#ixzz3iu4If6gX

READ MORE - Nembiak UPSI ke ngambi Jaku Iban deka dibantu

Papan Interaktif Jaku Iban

Papan interaktif suah dikena pengajar ngepunka proses NeB tauka nyadi set induksyen. Kereban tu beguna dikena narit pengerindu nembiak ngambika besedia napi pelajar.

Kereban tu ulih download ba link di baruh tu.

Papan Interaktif Jaku Iban Primari 4

READ MORE - Papan Interaktif Jaku Iban

Bepangkat Tang Muntat

Kasih mih nuan igat,
Belajar sekula penapat inat,
Apai indai nuan gawa naka pengeliat,

Ngiga belanja berkering urat,
Ngambi ka nuan bepenemu manah amat,
Chukup pemandai enda dikumbai muntat.

Kita sekaban naka pengaga,
Meda nuan mujur sekula,
Belajar ba universiti bulih master,
Ngarap ka nuan tau menyana,
Lebuh sida tusah mantu sida iya,
Ngambi ka ngasai tulung diri sebala,

Tang sayau semua nya semina igau,
Munyi jaku kutap orang ke palau,
Bekechiau munyi semalau,
Nadai nguntung pemansang pendiau,
Laban nuan udah jauh mamau,
Enda ingat ka tusun pendiau.

Nuan bepangkat manah kereja,
Nyadi tuai megai menua ,
Chukup dikemalu ke raban bansa,
Laban nuan bekuasa ba atas semua,
Tegal nya nuan lalu lawa,
Enda ingat ka pesan petara.

Nuan bepangkat tang muntat,
Enti dirara lalu ngerijat,
Chukup kering jaku mai betapat,
Laban semua kuasa nuan ba dakwat,
Tang ila nuan nesal diperaka urat,
Nadai siku ka datai nemuai enggau rabat.

READ MORE - Bepangkat Tang Muntat

Teori Segitiga Semiotik (Ogden Enggau Richard, 1923)

Konsep Teori Segitiga Semiotik

Nitihka C.K. Odgen & I.A. Richard (1923), dalam bup “The Meaning of Meaning”, reti dipeda ba tiga komponen iya nya lambang tauka simbol , pikir  enggau pekara. Komponen tu tadi bisi besangkut paut enggau pangan diri sekalika nengah kaul ke menyana tauka kaul enda besekat. Kar ba baruh iya nya kar segi tiga semiotik ti diasilka Odgen enggau Richard.

Kar 1: Teori Segitiga Semiotik

Nengah teori tu, seduai nguji nerangka reti ari sukut komponen nya ngena segi tiga. Reti diterangka bepelasarka tiga komponen ti dipecahaka iya nya symbol (leka jaku), pikir (konsep) enggau referens (pekara tauka penemu). Raminah Hj Sabran & Rahim Syam (1987), madahka symbol iya nya konstituen linguistik baka leka jaku tauka ayat, referens iya pekara lalu pikir nya konsep. Dalam segi tiga semiotic, garis entara simbol enggau referens nya putus-putus laban nandaka kaul entara simbol enggau referens enda besekat  

Nitihka penemu Odgen enggau Richard tu tadi, simbol tauka leka jaku meri konsep ba pikir lalu pikir deka ngenataika pekara tauka konsep nya ngena referens. Kaul entara simbol enggau konsep tauka pikir enggau referens iya nya kaul ti menyana (direct relationship) lalu konsep tauka pikir nya mih ke bekaulka simbol enggau referens. Taja pia, simbol enggau referens nadai ngembuan kaul ke menyana (indirect relationship) lalu ditanda ngena garis putus-putus baka ba baruh.

Teori Segitiga Semiotik Enggau Chunto

Sitiawati (2005), mantaika penemu ti madahka semantik nya bidang linguistik ti mansik reti simbol jaku. Iya  madahka teori segitiga semiotik nya seruran dikena dalam teori semantik nyentuk ke sehari tu. Bepelasarka segitiga semiotik, iya mandangka entara simbol leka jaku enggau konsep ngembuan kaul ke menyana lalu simbol leka jaku enggau referens tauka pekara nya nadai ngembuan kaul ti menyana laban enda tau enda nengah konsep dulu. Ngambika pekara tu terang agi, uji peratika chunto kar ba baruh.

Kar 2: Chunto Teori Segitiga Semiotik 

Bepelasarka kar ba atas, lebuh siku orang nya nyebut “kusing” (simbol), orang ti ninga lalu berunding dalam pikir iya (konsep) gaya jelu “kusing” (referens). Leka jaku “kusing” nya simbol ti mandangka gaya siku “kusing” ba pikir kitai mensia. Bisi kaul entara pikir enggau “kusing” lalu pia mega entara pikir enggau pekara ke bendar. Taja pia, entara simbol enggau referens nya nadai ngembuan kaul ti menyana. Sesebengkah simbol nya ulih berubah nitihka peneleba enggau runding genap iku orang. Nya alai bisi sekeda kitai madahka kusing nya entambah, emperaja, kesindap enggau ti bukai. Nengah nya tadi, terang amat leka jaku diasilka ari sakum sesebengkah reti enggau tukuh iya.

Disimpulka aku ditu, teori tu ngembuan pengelemi ari mayuh sukut enti diperatika amat-amat. Nyata amat Teori Segita Semiotik tu enda ulih mandangka kaul referens enggau simbol. Kelimpah ari nya, iya mega enda ulih nerangka reti ti betukuh abstrak baka asai ati, adjektif enggau ke bukai. Teori Segitiga Semiotik mega enda ulih nentuka reti ari sukut jaku bebungai tauka jaku karung ketegal ti enda tetap sereta ulih berubah enti dipeda ari suku referens. Nya alai, teori tu baka teori ke bukai mega enda ulih dikumbai kitai teori ke meruan ketegal ti mayuh pengelemi. Chara kitai ngena iya ngembuan sekat dikena ngenatai tauka nerangka reti. 

READ MORE - Teori Segitiga Semiotik (Ogden Enggau Richard, 1923)